Im syrtok ki paidbah sahkut ki kali motor ha surok Sonapur Borkhat, kyrpad ka KSU ban ai jingiarap

Syllad | The Rising MeghalayaApril 10, 2023

Ki paidbah ka thain khappud India Bangladesh kiba kynthup iaka Huroi, Hingaria, Lahalein, Lejri marsien poi ka aiom slap kila hap ban im iaka jingim hapdeng ka jingsyrtok namar ba sahkut ki kali motor haka surok ktieh bad kim lait shu ban leit ban wan.

Ka Khasi Students’ Union (KSU) Huroi Unit kala kyntu iaka sorkar bad ka nongmihkhmat kynthei ba marwei ka rilum Jaintia kaba dei ruh ka MLA ka thain Sutnga Saipung, ka kong Santa Mary Shylla ban pynioh jingiarap ia kine ki shnong khappud khamtam ha kum kine ki por ka aiom slap ba sahkut ki kali motor bad kim lah satia ban pynpoi mar bam mar dih bad pynpoi sha iew sha hat iaki mar rep.

U president KSU Huroi, u Wallam Lamin Gadew ula ong ba ka jingsniew jong ka surok dei namar ka jinglong ktieh jong ka shaba palat liam, wat tang ban leit ïew leit hat, leit shim dawai ki paitbah kila shem jynjar bad im iaka jingim hapdeng ka jingsyrtok. U la ong ruh ba ka sorkar ka dei ban phah da ki puh shilum (JCB) ban tong bad pynkhuid ia kitei ki ktieh ban pynjem aika jingeh khnang ba ki kali kin lah ban iaid ha kane ka surok.

Na ka liang une u nongialam ula kyrpad jur ia ka sorkar, MLA Sutnga Saipung ka Santa Mary Shylla bad ia ki bor ba dei khmih ban pynioh jingiarap iaki nongshong shnong.

Kumban shu pynkynmaw ba ia kane ka surok Sonapur Borkhat la dep ban buh mawnongrim ban sdang ka jingtrei ha u bnai Naiwieng 16 tarik 2022 da u symbud myntri rangbah ka Jylla u Bah Prestone Tynsong.

Ka surok Borkhat Sunapur ka don ka jingjngai kaba (39.594 KMS) bad la pyntrei ia kane ka surok lyngba ka jingbei pisa ka North East Road Sector Development Scheme (NERSDS) haka jinglut kaba T. 126 klur.