International Water Conclave 2024: Kdew u Conrad iaka jingkongsan ka teknoloji ban sumar iaka um

Syllad | The Rising MeghalayaFebruary 9, 2024

U Myntri Rangbah ka Jylla u Conrad K Sangma ha ka jingkren ha ka jingïalang jong ka International Water Conclave kaba la long haka 9 tarik u Rymphang ha Courtyard by Marriot Hotel, Shillong u la kdew iaka jingkongsan ka teknoloji ban sumar iaka um bad ka jingiakren hadpeng ki jylla bad ka ki ri haka pyrthei ha kaba ïadei bad ka jingkylla ka suiñbneng bad ka long ka man ka sawdong sawkun ka mariang.

 “Ki um ki wah kim don pud satia bad haba poi halor ki mat ba kongsan ha kaba ïadei bad ka um bad ka sawdong sawkun, ka long kaba donkam ïa ki jylla bad ki ri ka pyrthei ban don ka jingïakren bad mir jingmut lang. Lada ki jylla ne ki ri kim shym la snohkti lang halor ki jingpyrshang bad ki thong, ngin ym lah satia ban poi sha ka jingjop,” la ong u Myntri Rangbah.

Ha ka jingkdew halor ki mat treikam jong ki climate council  ha ka jylla, ki thaiñ bad ha ka ri hi baroh kawei, u Myntri Rangbah u la ong, “ki mat ba ïadei bad ka jingkylla ka suiñbneng ki dei kiba ktah jur bha halor ki tyllong um. Ka jingdon bynta lang jong ki shnat bapher bapher ban ïakren bad ïatreilang halor kine ki mat ryngkat ka jingkitkhlieh bad ka jingsam  jingtip lang ka dei kaba lah ban wanrah shibun ka jingkylla hapdeng ki jingeh kiba mih na kane ka jingshah ktah halor ka jingkylla ka suiñbneng”.

Haba kren shaphang kane ka jingïalang jong ka International Water Conclave lane ka jingïalang jong ki synjuk ri ka pyrthei ba ïadei bad ka um, u la ong “Ka jingthmu jong kane ka jingïalang ka dei ban wanrah lang ïa ki tnad bapher bapher jong ka sorkar bad ki dkhot bapher bapher jong ki seng treimon sngewbha ban shimkhia halor kane ka mat bad ym dei ban pynleit jingmut tang halor ka jingpyntreikam ki skhim ne ban pyndep ïa ka thong”.

Haba kdew pat iaki kyndon treikam ba ïadei bad ka um ne ka Water Policy, u Myntri Rangbah u la ong “Ka Meghalaya ka dei kawei na ki jylla kaba la don ka Water Policy napdeng ki khyndiat tylli ki jylla kiba la sdang ïa kane ka Policy, ka ban ai jingmyntoi lang ha baroh ki liang naduh ka jingsam um, ka jingpyllang, ka jingpynneh pynsah, ïada ha ki jaka ba noh sharing, ka jingpynbha ki umpohliew khnang ba lah ban pynbiang baroh ki jingdonkam ba ïadei bad ka um ka wah.”

Ula ong shuh shuh ba kane ka mat pyntreikam ka dei kaba plie iaka sorkar ban khmih kiba bun ki jingeh ba ïadei bad ka um.

U la ïathuh “Ba mynta ki don palat ka 6800 tylli ki shnong ha ka jylla bad hajan manla kine ki shnong ki don ki kynhun ba khmih ba ïadei bad ka um bad lada mih kano kano ka jingeh ba ïadei bad ka um ngi pynthikna ba kine ki kynhun kin shimkhia ha kane ka liang, ban treilang bad ka sorkar jylla, kumjuh ruh bad ki heh jong ki bor pynïaid distrik bad blok bad shim ki sienjam kiba donkam ba lah ban ai jingmyntoi lang ïa baroh bad kaba lait na ka jingktah ka sawdong sawkun bad pynthikna ka jingtreikam naduh na tynrai”.

U la kdew iaka jingkongsan ban pyn donkam da ki kor tekhnoloji ban lum jingtip bad jingkheiñ bad ban khmihthuh ha ki bynta ba ïadei bad ka um. Halor kane u la ong “Ba ka jylla ka la ïatrei ryngkat lang bad ka NESAC (North Eastern Space Applications) ka tnad tihbniah ba ïadei bad ka haw haw kaba don hangne, bad kane ka dei kaba la khmihthuh halor ki umpohliew, ki Nan, ki khlaw ki btap, ki kam ba ïadei bad ka rep ka riang bad ka jingtih maw bad shen  ngin sa buh noh da ka Data Innovation Center ban lum jingkheiñ bad jingtip bad phah jingtip kylla pat sha ki tnad bapher bapher khnang ba lah ban pyni dak lypa kaba lah ban ai jingmyntoi ïa ki tnad bapher  bapher halor ka jingpynbit pynbiang ki jingdonkam ba ïadei bad ka um”.

U la pyntip ruh ba ka Asian Development Bank ka dei kaba la ai jingkyrshan ïa ka sorkar jylla halor ka jingshna 600 tylli ki Small Multipurpose Reservoirs ha kylleng ki jaka jong ka jylla. Kynthup ruh 81 tylli ki jaka ri dohkha kiba la dep shna ha kylleng ka jylla.

Kane ka jingïalang ba arsngi ka dei kaba la wan ban ïashim bynta da ki nongmihkhmat na ki ri bapher bapher ba kynthup na Thailand, Nepal, Bhutan, Myanmar, Cambodia bad Vietnam bad ki nongmihkhmat na ki tnad bapher bapher bad ki jaka ai jinghikai jong ki ri ka pyrthei.

Kum shibynta jong ka jingïalang, ka rai ba mih na kane ka jingïalang ne ka Shillong declaration yn soi da kine ki nongwan mihkhmat na kylleng ki jaka jong ka ri ban sam jingtip halor ki jingpyntreikam kiba kynsai bad rukom pyntyllun ki kam halor ka jingpynneh pynsah ïa ki thymmei um bad kumjuh ruh ki tyllong um.

“Kane ka jingïalang ka long kaba kongsan haduh katta katta na ka bynta kane ka thaiñ ban snohkti bad treilang halor ka jingpyrshang jongngi ban poi sha ka thong kaba kham heh bad wanrah ka jingkylla bad kumjuh ruh ban wallam lang ki tnad kum ka PHE, Soil & Water Conservation, Forest, Agriculture, Fisheries, Mining, bad Tourism ha kajuh ka thup” la ban bad ong u Myntri Rangbah.

Ha kane ka program la wan ban ïashim bynta ruh da u Myntri ka tnad Water Resource u Ma Comingone Ymbon, Ka Myntri ba khmih ka tnad ka koit ka khiah ka Kong Ampareen Lyngdoh, u Myntri ka tnad Fisheries, u Bah AL Hek bad ka Secretary jong ka tnad Jal Shakti, ka sorkar India ka Debashree Mukherjee nalor kiwei kiwei

Ha kane ka sngi ka la don ruh ka jingsam khusnam da ka pisa bad syrnot sha kito ki nongjop ha ki jinglehkai bapher bapher ba la pynlong ba ïadei bad kane ka jingïalang.