Ioh Ambulance 108 biang ka Amlarem sub Division, weng noh ka JSU iaka lama

Syllad | The Rising MeghalayaMarch 7, 2022

Ka Jaintia Students’ Union (JSU) haka sngi Nyngkong kala weng noh ia ka lama iong ba la sieh ha Nongtalang CHC mynta la 9 bnai hadien bala wanrah biang iaka Ambulance 108 hapoh Amalarem Sub Division.

Ka JSU kala dawa naka por sha ka por ban pynioh biang ia kane ka kali kit nongpang naduh u snem 2018 bad buddien ruh ha u snem 2020 ha kaba la ai dorkhat ruh sha u AL Hek Myntri barim ka tnad ka koit ka khiah ha u snem 2020, ia u James Sangma myntri ka Health ha u snem 2021 bad ruh ia u Ram Kumar, Director ka NHM bad Dr. Aman War, Director ka DHS(MI) bad sha u MLA ka thaiñ ban pynioh ia kali kit nongpang ha kane ka sub division.

Hadien baka sorkar kala pynioh biang ia kane kali kit nongpang ka JSU kala weng syndon ia kala lama iong kaba la sieh ha kane ka jaka sumar naduh 4 tarik u bnai Jylliew 2021.

Na ka liang u General Secretary ka JSU central Body u Treiborlang Suchen u la ong ba kane ka kali ka ju don ha Amlarem Sub Division, hynrei ym tip na kaei ka daw la pynduh iaka jingshakri jong ka. Kumta hadien ka jngujor u paidbah iaka jingshitom ban kit iaki nongpang, ka JSU kala buh iaka jingdawa ha khmat u nongmihkhmat, ki myntri ka koit ka khiah bad sha u DHS kaba kane ka jingdawa jong ki kala urlong mynta ka sngi.

U President ka JSU War Jaintia Circle, u Eddy Kery Pohtam,  u la pynpaw ka jingsngewnguh ia baroh kiba don bynta ban pynpoi biang ia ka 108 service hapoh ka thain naduh ki doktor ka ChC bad ki PhC bad ruh ia ki Director ka tnad DHS u bad NHM bad kumjuh ruh ia u SDO barim ka Amalrem Civil Subdivision u Abhilash Baranwal bad khamtam eh ia ki riew paidbah kiba long ki nongkyrshan ia ka seng ha ka ne ka jingdawa ka jong ka thain