Ïoh Award ka kynhun tem bad u rangbah na Jowai

Syllad | The Rising MeghalayaFebruary 3, 2019

JOWAI: Ka Rotary Club Jowai kala ai Award ïa kawei na ki kynhun tem na Ammutong bad ïa uwei u samla rangbah na Jowai haka sngi Saitjaiñ.

Kane ka kynhun tem ka dei ka Youth Social & Music Club, Ammutong ka kynhun kaba tem haki jingkhawai ïathoh shongkurim bad kiwei kiwei ki prokram bad u Ma Saje Laloo, u nongseng kam lajong bad u don ka plantation ha Ri Bhoi.

Kumban shu pynkynmaw u Ma Saje Laloo, u nongshong shnong ka Panaliar, Jowai u dei u samla rangbah uba la pyrshang ban ai ka jingïada ïaka wah Myntdu bad ula mudui da ka mukotduma sha ka ïing bishar ba don burom ka National Green Tribunal (NGT) ba kan tuklar bad ban pynbor ïaka sorkar jylla ban shna ïaki nur bah ban lait ki jakhlia ban tuid sha ka wah.

Kane ka award ka dei ka ‘Vocational Award’ kaba ka Rotary Club ha kylleng ki jaka ka ai ban pynshlur bad ban ai mynsiem ïaki riew shimet, ki samla samhoi, ki kynhun ha ki jait kam bapher bapher bad ban long ki nuksa ïa kiwei.

Ïa kane ka award la aiti haka jinglehkmen “Charter Night” ka Rotary Club Jowai kaba long ha Orchid Inn, Thadlaskeiñ Mukhla, West Jaiñtia Hills District.

U Honourary Member of Rotary Club Jowai Garod LSN Dykes ula long u kongsan bad la ïadonlang u Rtn. B Shilla, Assistant Governor Zone-X, Rtn. SK Lato (MPHF), Vice President, Rtn. BP Najiar (PHF), President, Rtn. EF. Gatphoh (MPHF) Charter President, Rtn. A Susngi (RFSM) Secretary bad kiwei kiwei.