Ïoh Award ka nonghikai na Rilum Jaiñtia ba pynkylla dur ïaka skul da ka buit thung phlang
JOWAI: Kawei ka nonghikai skul na Rilum Jaiñtia kan ïoh ïaka khusnam ‘Teacher Innovation Award 2019’ halor ka jingjop jong ka ban pynkylla dur ïaka phyllaw jong ka skul kaba dap da ka pum pum bad ka ktieh sha ka skul kaba khuid kaba suba da kaba thung phlang.
Kane ka nonghikai SSA kaban ïoh ïa kane ka Award ka dei ka Kong Niawki Samati, kaba hikai haka skul Lummynso Upper Primary SSA, Ummulong, West Jaiñtia Hills District.
![](https://www.syllad.com/wp-content/uploads/2024/09/JIT-Vacancy-823x1024.avif)
Kala shah jied ban ïoh ïa kane ka khusnam halor ka buit ban thung phlang ïaka phyllaw jong ka skul baroh kawei khlem da pynlut pynsep eiei ban lait na ka pum pum bad ka ktieh. Kala pyndap online haka ‘Zero Investment Innovation for Education Initiatives’ (ZIIEI) halor ka phang ‘A Clean, Green & Healthier Campus’.
Ka ZIIEI, kaba pyniaid da ka Sri Aurobindo Society manla u snem ka jied ïaki nonghikai na kylleng ka ri halor ka jingsynniang jong ki haki skul ban pynbha ïaki skul bad ka pule ka puthi khlem da pynluti eiei.
Ka Kong Niawki Samati kala iathuh ba ha ki 9 snem ba kala hikai ha kane ka skul kila shem jingeh bha namar ba haba rang bneng ruh ki hap ban shah ïaka pum pum bad haba slap ruh ki hab ban iaid ban ieng haka ktieh.
“Ki khynnah skul ruh ki hap ban shah iaka pum bad ka ktieh bad haba ki lehkai ruh ki sopti ki patlun bad ki juti kila bit ktieh lut,” la ong ka kong Niawki.
“Kumta ban weng ia kine ki jingeh ka wan ha ka jingpyrkhat jong nga ba dei ban thung da u phlang bad nga la pashat iaki jingmut jong nga hakhmat ka School Managing Committee (SMC), ki para nonghikai bad ki longkmie longkpa ki khynnah skul bad baroh kila mynjur ïa kane ka buit,” la ong ka kong Samati bad bynrap ruh khlem da pynslem ha ka 17 tarik May 2019 kila mih ban iatreilang ban thung ia u phlang ha phyllaw jong ka skul khlem da pynlut eiei namar ïa u phlang ruh la ioh na jan jong ka skul.
Ka Kong Niawki kala ong ba kane ka jingioh Award jong ka kadei ka jingjop jong ka skul, ka shong Lummynso bad ki kmie ki kpa bad ki khynnah skul namar ba da ka jingiatreilang ba kila lah ban thung ia u phlang haka phyllaw jong ka skul baroh kawei.
Kane ka nonghikai kala ai khublei ruh ia u Bah Everest Myrsing, Academic Mentor Bharti Foundation, West Jaintia Hills uba pynshlur ia ka ban thep online ïa kane ka buit jong ka haka ZIIEI.
Ia kane ka ‘Teacher Innovation Award 2019’ ka kong Samati kan leit shim haka 17 tarik une bnai haka jingialang pynkup burom haka nongbah Delhi da u HRD Minister Ramesh Pokhriyal haka 17 tarik une u bnai haka sngi rakhe ïaka jingdap 25 snem ka National Council for Teacher Education (NCTE) ha Menekshaw Center Delhi.
Hashuwa kane kan don ka jingïakynduh lang ki nonghikai na kylleng kiba ïoh ïa kane ka khusnam ban ïasam buit bad ïaphylliew jingmut haka 16 tarik haka jingïadonlang u Director Education ka Sri Aurobindo Society ha Delhi.
Leave a Reply