Ioh bat ka HYC ia 4 ngut ki nong Bangladesh na Shella, kyntu shimkhia ia ka jingwan buhai shnong beain

Syllad | The Rising MeghalayaApril 22, 2025

Ka Hynniewtrep Youth Council (HYC) haka 21 tarik Iaiong ki la ioh ban bat noh ia saw ngut ki suba nong Bangladesh na ka shnong Shella, East Khasi Hills kaba don ha khappud bad ka Bangladesh, bad dawa ruh na ka sorkar jylla ba kan shimkhia mardor halor ka mat kaba iadei bad ka jingwan buhai shnong beain jong ki nong Bangladesh ha kane ka jylla.

Haba pyntip ia kane sha ki lad pathai khubor, u President ka HYC u Bah Roykupar Synrem u la ong, “Mynta ka sngi ha ka por kumba 8 baje mynstep ki dkhot ka seng na Shella Unit ki la ioh ban bat noh ia saw ngut ki briew ia kiba la suba ba ki dei kiba wan na Dalia kaba don hajan ka jaka ba ker sainar ha khappud bad ka Bangladesh. Ha ka jingtohkit kine ki briew ki la pyntip ba ki la wan poi ha Dalia ha ka miet sngi U Blei ba la lah bad ba ki thmu ban leitphai biang sha Shillong bad shapoh Assam. Kine ki briew ki la pyni ruh ia ki EPIC card, Aadhaar bad PAN Card kum ki jingpynshisha ba ki dei ki nong India.

Kine ki briew ki la kam ruh ba ki la wan sha Dalia kum ki nongjngohkai pyrthei, hynrei kim shym la lah ban ai ia ka kyrteng jong u trai iing kaba ki sah ha katei ka miet, bad kum lah ruh ban iathuh da ka kali aiu ki la wan sha katei ka shnong.

U Bah Synrem u pyntip ba hadien ka jingtohkit bniah la shem ba uwei napdeng kine ki saw ngut u don artylli ki EPIC card kiba ha la ki jong ki kyrteng, kata u Samchul Hoque bad u Samchul Bor kiba la ai ha kajuh ka tarik da u electoral registering officer napoh Nagaon district, Assam.

“Kane ka la pynartatien jur ia ki dkhot ka HYC, bad hadien ba la peit ia ki phone jong ki, kawei na ki dur kaba ki don ka dei ka pisa Bangladesh. Hadien ba kim ioh ia ka jubab kaba biang na kine la ki dei ne em ki nong India, kumta ki dkhot ka seng ki la aiti noh ia ki shapoh Shella PS,” ong u Bah Synrem da kaba bynrap, “Nga la phone ruh da lade ia u SP ka East Khasi Hills halor kane ka jingjia ha kaba u la phah ia u SDPO na Sohra  sha Shella ban tohkit bniah la ki dei shisha ne em ki nong India kumba ki la kam.”

Lap dien iaka kynhun pynrung tuh ia ki nong Bangladesh sha India, kem ki pulit Meghalaya 3 ngut na Mumbai kurup iaki kot ki sla thok

“Ha ka jingtohkit, u SDPO u la ong ba kine ki briew ki la pyntip sha ki pulit ba ha ka jingshisha ki thmu ban leit shapoh NEIGRIHMS na ka bynta ban ioh jingsumar hynrei kim lah pat ban iathuh kumno ki la wan poi sha Shella kaba la pynmih ia ka jingartatien ha ki jingpyrkhat jong ngi, bad ka tnad pulit ka dei ban shimkhia halor kane ka bynta da kaba pynlong ia ka jingtohkit kaba kham bniah,” u la ong.

Haba pynpaw ka jingsngewkhia halor ki kam wan rung beain shapoh ka jylla, une u nongialam ka HYC u la ong ba naduh kine ki khyndiat taiew ba la lah ka HYC ka la ioh jingtip lyngba ki tyllong khubor bad ki briew kiba shong ba sah ha khappud ba ka jingwan rung jong ki briew napoh Bangladesh sha u pud u sam jong ka India ka la jur bha.

Ha kaba iadei bad ka jingkren jong u Myntri kam pohiing ka Sorkar Pdeng, u Amit Shah halor ka jingjur ka jingwan rungtuh jong ki nong Bangladesh sha India lyngba ka West Bengal lyngba ki kot ki sla kiba biang, u Bah Synrem u la ong, “Lada kine ki briew ki lah ban ioh ia ka EPIC, Aadhaar ne Pan Card na West Bengal ne Assam ne na kiwei pat ki jylla, kumta ruh ki lah ban wan rung da kaba suk sha Meghalaya, bad shisien ba ki la wan sha kane ka jylla kin shong kin sah bad hadien katto katne por kin kylla long ki nongshong shnong ka jylla.

“Ngim kwah ba kane kan wan jia bad kumta ngi khot ia ka sorkar jylla ba kan shimkhia  halor ka mat kaba iadei bad ka jingwan rung beain ki nong Bangladesh. Lada ym shim ia ki sienjam, ngi syier ba kan sa poi ka sngi ba kine ki briew kin sa ioh ban long ki nongshong shnong ka jylla Meghalaya bad ban long ki nongthep vote bad ioh ia baroh ki hok bad ki jingmyntoi kumba ioh ki trai shnong ka jylla,” u la bynrap.

Shuh shuh u Bah Synrem u pyntip ba ka COMSO ka la thoh sha u Myntri Rangbah ka Jylla ha kaba iadei bad ka jinglong jong ka ILP bad ka MRSSA amendment bill, 2020 hynrei tad haduh kine ki sngi ka COMSO kam pat ioh satia ia kano kano ka jubab na u Myntri Rangbah.