Ïoh bat ka JNC bad JYF ar trok ki masi suba shalan tuh

Syllad | The Rising MeghalayaAugust 23, 2019

KHLIEHRIAT: Ka Jaintia National Council (JNC) bad ka Jaintia Youth Federation (JYF) kila ïoh bat ar tylli ki truck kit masi kiba suba jur ba ki dei kiba thmu ban shalan tuh sha Bangladesh na Khliehriat haka por 1 baje nohphaisngi haka sngi Thohdieng.

Kine ki ar tylli ki trok kila kit haduh 57 tylli ki masi bad na kaliang u Allmiki Ryngkhlem Vice President jong ka JNC kila ong ba kine ki kali kim don kot don sla ne challan ban shalan ïa kine ki masi.

Ula ong ba ki suba jur ba kine ki masi dei kiba thmu ban shalan beaiñ bad mar mar kila pyntip sha ki Pulit jong ka Khliehriat bad kila kurup ïaki kali, masi bad bat ïaki nongniah ki trok. Halor kane ka jngioh bat ia kine ki masi ka jingtohkit kala iaid shakhmat.

Ka JNC bad ka JYF kila kyntu ïaka aiñ ba kim dei ban pyllait ïa kine ki kali bad masi lada ki trai kim lah ban pynbiang kot sla ban shalan ïa kine ki masi. Bad kila dawa ruh ban kem ïaki briew kiba donkti ban leh ki kam khaïi masi beaiñ.

Une u nongialam ka JNC ula pynpaw ba kila ioh bun ki jingujor ha ka jingiadei bad kane ka kam khaii masi tuh shaduh sha Bangladesh kaba la wanrah ïaka jingkiew dor ka doh masi ha iew ha hat.

Kane ka jingjyllei ka jingkhaii masi tuh sha Bangladesh ka plie lad ïaki nong Bangla ban rung beain shapoh ka jylla na ka bynta ban wad kam wad jam bad ka lah ban buh jingma namar ba jur ka jingwan buhai shnong jong ki sha kane ka thain la ong u Allmiki Ryngkhlem.