Ïoh bat ka KSU 10 ngut ki suba Bangladesh

Syllad | The Rising MeghalayaApril 5, 2022

Ka KSU, Moodymmai bad Jowai Circle kila ioh bat 10 ngut ki suba Bangladesh na kawei ka trok ha Thadlaskein haka sngi Nyngkong.

U publicity secretary KSU West Jaintia Hills District Unit, Juhhi Tariang ula iathuh ba ia kine ki suba Bangladesh la ioh bat na kawei ka trok kaba don u register number RJ 07 GB 2246 hadien ba ka KSU kala pynap shrip ba don ki bar jylla bar ri kiba wan rung beaiñ sha kane ka thain.

U Tariang ula iathuh ba kine ki briew kila phla ba ki dei ki nong Bangladesh bad kila shu wan rung tuh sha kane ka ri.

Baroh kine ki briew la aiti iaki sha ka tnad Infiltration bad ka KSU kala dawa ban pynphai mardor ia kine ki suba Bangladesh na ka jaka kaba ki wan.

Ha kane ka jingioh bat ia kine ki bar ri ka KSU la lam khmat da u Phraki Howni Thubru general secretary ka KSU Jowai Circle, u Jerrymaia Laloo assistant finance secretary ka KSU Moodymmai Unit bad kiwei kiwei.

Ka KSU kala ong ba kan nym shong kli kti bad kan pyntreikam hi iala ka jong ka ILP ban tem iaka jingwan buhai shnong beaiñ ki bar ri bar jylla ha kane ka rilum Khasi Jaintia. Kala kyntu ruh ia baroh ki nongshong shnong ban iatreilang ban khanglad ia ka jingthmu wan bhuhai shnong beaiñ ki bar ri bar jylla.