Ioh Best Cinematography ka phlim ‘Rapture’ ha ka “7th Malaysian International Film Festival”

Syllad | The Rising MeghalayaJuly 31, 2024

Ka phlim “Rapture,” ba la direct da u Dominic Sangma ka la jop ia ka khusnam Best Cinematography award ha ka tamasa phlim ba pawkhmat ka “7th Malaysian International Film Festival” (MIFF) kaba la long ha ka 28 tarik Naitung ha Kuala Lumpur.

Ia kane ka khusnam la iohpdiang da u nongshna phlim ba tbit jong kane ka phlim, u Toxo Xavier, uba ka jingtrei ba kyrpang jong u ka la ioh pdiang ka jingiaroh na ki ri ka pyrthei lyngba kane ka phlim Garo na kane ka Jylla Meghalaya.

Ka “Rapture” ka dei kaba la pynlong hapdeng ki Garo ha Meghalaya, Northeast India, bad ka bud ia ka jingiathuhkhana shaphang uwei u khynnah uba dang shiphew snem rta uba duna ha ka bor iohi ha ki khmat jong u.

Une khynnah u shong u sah ha kawei ka shnong kaba la shah ktah ha ka jingtieng jingsyier namar ka jingnang jah rngai jong ki briew, ha kaba ki khubor ki saphriang shaphang ki nongrahbor kiba khaii ia ki dkhot met briew.

Ka khana kaba sngewtynnad jong ka phlim bad ki dur kiba phylla ki la khring ïa ki nongpeitkai ha kylleng ka pyrthei, da kaba pyni ruh ia ka riewspah jong ka kolshor jong ka jaidbynriew Garo.

Ia kane ka phlim la kyrshan da u Hubert Bals, Visions Sud Est, bad ka Doha Film Institute. La pynmih ia kane ka phlim da ka Dominic Sangma’s Anna Films ryngkat ka jingiatreilang bad ki nongpynmih phlim na China kiba kynthup ia u Xu Jianshang bad Sun Li, bad ki nongpynmih na India kiba kynthup ia u Anu Rangachar, Harsh Agarwal, Aditya Grover bad u Stephen Zacharias.

Ka Eva Gunme R. Marak naMeghalaya kaba dei ka nongkyrshan ia ki kam shna dur jong ka thain shatei lammihngi jong ka ri India, ka la don ka bynta kaba kongsan ha ka jingpynmih ia kane ka phlim.

Shisnem hadien ba la pyni ia kane ka phlim “Rapture” sha ki ri ka pyrthei, yn pyllait ia kane ka phlim ha ka sien kaba nyngkong ha  ha Tura, Meghalaya ha ka 15 tarik u Nailar. Ka jingpynkhreh ban pyni ia kane ka phlim ha la iing hadien ka jingwanphai ka dei kaba la khmih lynti bha da ki nongshong shnong bad la khmih lynti ba kan ioh ia ka jingpdiang sngewbha.

Ka jingjop jong kane ka phlim ha ka MIFF kam pynpaw tang ia ka sap hapoh ka jaidbynriew Garo hynrei ka buh ruh ia ka cinema jong ka Northeast India ha ka map jong ka pyrthei.

Ka jingpyni dur ba ngam jylliew jong ka phlim ia ki khanatang tynrai jong ka thain bad ki mat ba mynta ka pynkhih mynsiem ia ki nongpeitkai ha ka pyrthei, kaba pynlong ia ka kum ka bynta kaba pawnam ha ka pyrthei phlim mynta.