Ioh biang ka USTM ia ka jingjop ha ka pule puthi; pass 62 ngut ki samla ia ka UGC-NET

Syllad | The Rising MeghalayaOctober 20, 2024

Ka University of Science and Technology Meghalaya (USTM) sa shisien pat ka la lah ban pynpaw ia ka jingjop ka jong ka ha ka liang ka jingkiew ha ka pule puthi hadien ba haduh 62 ngut ki samla pule jong ka ki la pass ia ka UGC bad CSIR NET & JRF eksam kaba la long ha u bnai Jylliew mynta u snem.

Kane ka la bynrap ia ka jingjop kaba dang shen ha kaba haduh 386 ngut ki samla pule ka skul bah USTM ki la pass ia kine ki eksam national-level ba pawkhmat, kiba pynpaw ia ka burom bad ka nam kaba nangkiew jong kane ka jaka pule kaba la lah ban pynkhreh bha ia la ki jong ki khynnah ba kin iakhun ha kine ki eksam kiba jwat.

Kane ka jingjop kaba bteng jong kane ka skulbah lah ban pynshong nongrim halor ka rukom pynkhreh kaba bniah jong ka ha ka jingpule bad ka jingaiti jong ka ban kyntiew ia ka jingtbit hapdeng ki samla pule jong ka.

Ka sienjam kaba kyrpang kaba la noh synniang ha kine ki jingjop ka long halor ka ‘Pay Back Policy’ jong kane ka skulbah, kaba ai khusnam kylliang ia ki samla pule da kaba siew biang ia baroh ka bai pule hadien ba la lah ban pyndep ia kiba kum kine ki eksam kiba jwat. Kane ka policy ka long ruh kum ka jingpynshlur bad ka jingithuh ia ka trei shitom jong ki samla pule, bad ka ai ruh ka jingiarap pisa ia ki katba ka pynshlur ia ki ban lah ban leh bha ha ka kyrdan kaba halor eh.

Haba kren halor ka jingjop ba dang shen jong ka USTM ha ki competitive eksam national-level, u Chancellor kane ka skul bah u Mahbubul Hoque u la pynpaw biang ia ka jingkut jingmut kaba skhem jong ka skul bah ban pyniar ia ki prokram aijinghikai jong ka, da kaba pynksan ia ka thong jong ka skulbah ym tang ban iarap ia ki samla pule ba kin jop ha ki eskam jong ki hynrei ban pynkhreh ruh ia ki ba kin long ki nongialam ha la ki jong ki jong ki bynta kiba ki don.

U Hoque u la pynpaw ruh ia ka jingpyrshang jong ka USTM ban tyrwa jingkyrshan kiba pynshlur ia ki samla pule ban kham iakhun bad ioh mynsiem shuh shuh. U la pynskhem ruh ia ka nongrim jong ka skulbah ba ym dei ban kyntait ia kino kino ki samla pule kiba stad sha ki jingpule kiba kham shalor namar ka jingduna ha ka ioh ka kot, kaba pynpaw ia ka jingaiti jong ka USTM ban pynioh ia ka jingnang jingstad kaba mar ia ryngkat.

Haba ai khublei ia ki samla pule, u Vice Chancellor ka USTM u Prof. GD Sharma u la ban jur ba ka jingjop jong ka skulbah ka shong ha ka rukom aijinghikai kaba iaid shabar jong ka rukom jingpule tynrai. Nalor ka jingpynkhreh katkum ka sobjek, ka USTM ka ai ruh ki  soft skills training, interview workshop bad ki seminar kiba pynioh mynsiem kiba thmu ban pynthikna ba ki samla pule kin dei kiba la pynkhreh bha ia lade ha ka jingiaid lynti ha ka liang ka pule puthi bad ha ki kam ki jam. U Sharma u la kdew ruh ba kane ka jingjop jong kine ki samla ka pynshisha ia ka jingkhlain jong ki prokram aijinghikai khlem jingsiew jong ka USTM bad ka jingaiti kaba khlem artatien jong ka ban kyntiew bad pynroi ha ka liang ka pule puthi.

Kane ka rukom kyrshan kaba bniah ka la long u shabi ban iarap ia ki samla pule jong ka USTM ban leh bha ha ki eksamin jong ka ri kiba don ka jingiakhun kaba jur kum ka UGC bad ka CSIR NET & JRF.

I Dr Trishna Thakuria, Director jong ka University NET Forum ha USTM, i la pynpaw ïa ka jingjop jong ka Pay Back Policy jong ka skulbah, da kaba kdew ba T.1.3 klur tyngka la dep ban pynphai sha ki samla pule barim kum ka jingpynshlur ban pyndep ïa ki eksamin ba pawnam kum ka NET. Kane ka policy ka thmu ban pynshlur ïa ki samla pule ban bud bad ban ïoh ïa ki eksamin ba ïakhun ha ka kyrdan ba ha khlieh duh kum ka NET, GATE, SLET, IAS, bad kiwei kiwei ba la pynïaid da ka Sorkar Jylla bad Sorkar Pdeng. Kum shi bynta jong kane ka jingthmu, ki samla pule kiba ïoh ïa kine ki eksamin ki ïoh biang ïa ka bai skulbah jong ki, kaba pynpaw ïa ka jingangnud jong ka USTM ban kyntiew ïa ka jingnang jingstad.

I Dr Thakuria i la pynshai shuh shuh ba ka NET Forum ha USTM ka pynlong ïa ki jinghikai manla ka sngi hadien ka por 4:30 PM, kaba ai ka jingpynkhreh kaba kyrpang na ka bynta ki eksamin UGC NET. Kane ka forum ka long shi bynta jong ka Outreach Mission, kaba ai jinghikai khlem jingsiew na ka bynta ki eksamin bapher bapher, kynthup ïa ka NET, SLET, GATE, Banking, bad SSC, lyngba ka Centre for Competitive Examination jong ka. Naduh ba la sdang ïa ka ha u snem 2017, ka NET Forum ka la long ka bynta ba kongsan jong kane ka jaka, kaba don ka bynta kaba kongsan ha kaba kyrshan ïa ka jingpynkhreh eksamin jong ki samla pule bad ban noh synñiang sha ka jingjop ba phylla jong ka USTM ha ki eksamin ba ïakhun ha ka kyrdan jong ka ri.