Ïoh Chairman bad ka kyrdan EM ki 2 ngut ki MDC phet seng

Syllad | The Rising MeghalayaNovember 12, 2019

JOWAI: Ka Executive Committee jong ka Jaiñtia Hills Autonomous District Council (JHADC) kala thung Chairman ïa ki arngut ki MDC kiba phet seng naka Congress bad ïasoh sha ka National People’s Party (NPP) dangshen.

Kine ki ar ngut ki MDC ki dei u Aiborlang Shadap, MDC Barato bad u Arbor Hima Darnei, MDC Saipung.

Katkum ka jingpynbna kaba la pynmih haka 4 tarik une u bnai Naiwieng, ka Executive Committee kala thung ïa u Aiborlang Shadap kum u Chairman jong ka Elaka Boundary Committee bad ïa u Arbor Hima Darnei la thung kum u Chairman jong ka Rules Advisory Committee bad ka kyrdan jong kine ki MDC kan long kum ki Executive Member jong ka konsil.

Kumban shu pynkynmaw ba kine ki ar ngut ki MDC kila pynïasoh ïalade sha ka NPP haka 28 tarik Risaw bad tang hapoh ka shitaiew kila ïoh ïa katei ka shuki hapoh ka Executive Committee kaba ïalam u ma Thombor Shiwat, CEM JHADC.