Ïoh Health & Wellness Centre ba ar ka Jowai

Syllad | The Rising MeghalayaSeptember 23, 2019

JOWAI: U Ma Wailadmiki Shylla MLA ka Jowai ula wan ban plie paidbah ïaka Ladthadlaboh Health and Wellness Centre (HWC). Ka Ladthadlaboh Urban Health Centre kadei kaba ar ban kyntiew kyrdan sha ka HWC ha West Jaiñtia Hills District.

“Kane ka Health and Wellness Centre kadei shibynta jong ka Ayushman Bharat ban pynjan ïaki jaka sumar sha u paidbah ban ai ka jingshakri ïaki longkmie kiba kha ka pun bad ka koit ka khiah jong ki khynnah nalor ka jingpang kiba ym ïabit,” la ong u ma Wailadmiki Shylla haba kren kum u kongsan bad u kyrmen ba kane ka HWC ha kane ka shnong kan ai ka jingshakri kaba pura ïa u paidbah ka thain.

“Ka Sorkar Meghalaya kala sdang ka jingïarap pisa sha ka ki nongshong shnong naduh 2012 lyngba Megha Health Insurance bad mynta da ka jingïatreilang bad ka Ayushman Bharat la nang kyntiew ïaka jingïarap pisa,” u la ong u ma Wailad.

Ula pynshlur ïaki paidbah ban shim kabu ïa kane ka skim MHIS ka ïatreilang bad ka Ayushman Bharat-Pradhan Mantri Jan Arogya Yojna bad ban jur ïaki paidbah ban shim kabu ban pynrung kyrteng ïalade ha ki CHC, PHC bad ka ophis u DMHO kaba dang iaid ka jingpynrung kyrteng.

U Ma Russel Nongrum, Acting Waheh Chnong ka Dorbar Shnong Ladthadlaboh ula wer ïa ki paidbah ban shimkabu ïaki skim sorkar khamtam ki longkmie kiba kha ba bun ban pynrung kyrteng ïalade haka PMMVY bad ban bam ïaki jingbam ba tei ïaka met khnang ba ki khun ki kti jong ki kin nym tlot haka bor met bad ba kin heh san pura ban lait na ki jingpang.

Ula kyrpad ruh ïa u MLA ban shimkhia ban peit ïaka jingeh kane ka centre ha Ladthadlaboh namar ba kadei kaba khapngiah bad kaba dang dei tang ka ïing shongwai khnang ba kan lah ban ai ka jingshakri kaba paka ïa u paidbah uba hap ha ka jingpeit kane ka centre haduh palat 11 hajar ngut ki nongshong shnong.

Kiwei kiwei kiba kren ki kynthup ïaka Dr. JN Shullai, MO Ladthadlaboh Health and Wellness Centre. Ka Dr. H Uriah kaba la ïathuh halor ka jingkyntiew kyrdan ïaki jaka sumar HWCs bad ka jingthmu jong ka sorkar kalong ban ai ka jingshakri kaba paka sha ki paidbah nonshong shnong kumjuh ban hikai halor ka koit ka khiah.

Ha West Jaintia Hills yn kyntiew kyrdan 20 ki sub centre bad 7 PHC sha ki Health and Wellness Centre

Ka Dr. VJ Laloo kala kren halor ka Poshan Abhiyan ka jingai jinghikai ïau nongshong shnong ban bam ki symboh jingbam kiba tei ban lait na ka jingshah ktah haka jingheh jingsan ki khynnah bad ka jingduna snam kaba ka jylla ka shah ktah bha ha kane ka jingpang duna snam.

Ïa kane ka jingïalang la pynïaid da ka Dr. B Challam Addittional District Medical Health Officer, West Jaiñtia Hills District, haka jingdonlang MDC shusieh u ma Octomewot Lamin, General Secretary Ladthadlboh Dorbar Shnong u ma ABM Shullai,  ki doktor bad ki nurse, ki nongtrei NRHM, ASHA bad ki paid nongshim dawai ha katei ka centre.