Ioh iing skul thymmai ka Pdengkarong Govt LP Skul

Syllad | The Rising MeghalayaSeptember 30, 2024

U Chief Adviser Sorkar Jylla bad MLA Amlarem u Bah Lahkmen Rymbui haka 30 tarik Nailur ula plie iaka jingtei kaba thymmai jong ka skul Pdengkarong Govt. LP School haka jingialang kaba iphuh iphieng kaba la long ha phyllaw jong ka skul.

Kane ka iing skul kaba thymmai ka don haduh 7 kamra bad la tei lyngba ka Mission Education Phase II haka jinglut kaba T. 44, 97, 448.

U kongsan Bah Lahkmen haka jingkren ula pyrto iaki nonghikai, ki kmie ki kpa bad ki nongshong shnong naka bynta ka jingtrei shitom ka jong ki kat haduh ba kila ioh ia kane ka iingskul kaba thymmai.

U kyrmen ruh ba lyngba ka jingplie ia kane ka iingskul kaba thymmai kan pynioh iaka pule puthi kaba paka bad ka jinghikai kaba janai na ka bynta ki khynnah kane ka skul.

Hapoh ka 7-Amlarem Constituency la don kumba 39 tylli ki iingskul kiba la lah ban shna hapoh ki 5 snem kiba la dep bad dang don ruh kiba ka jingtrei ki dang iaid shakhmat, la pyntip u Bah Rymbui bad bynrap ba dang bun shuh kiwei kiwei kiba dang dei ban leh kum shibynta ban kyntiew shuh shuh iaki skul bad na ka bynta kata donkam ka jingiatreilang jong baroh kynthup ruh iaki tnad treikam sorkar.

Haba kyntu iaki khynnah skul kumjuh ki khun samla jong ka shnong, u Bah Rymbui ula pynshlur ban shim kaba bha tam haka jingim ka jong ki, da kaba ban jur ruh ban kiar raimaw raidieng na ka jingsniew ba saphriang lyngba ki jait jingdih ba har rukom.

Shuh shuh haba pynshlur pat, iaki samla ban ieng hala ki jong ki kjat khlem da shaniah iaki kam sorkar, u Bah Lahkmen ula ong, ka kam sorkar kamdei shuh kaba byllai hynrei ka jingnang jingstad bad ka sap ka phong kaba phi don, ka plie iaka jingmut jingpyrkhat ban wad ki lad ki lynti ban lah ban ieng hala ki jong ki kjat.

Ula kyntu ruh ia ki kmie ki kpa ba kin iatreilang bad ki nonghikai khnang ba ka lawei jong ki khynnah kan long kaba phyrnai.

Iaka jingialang plie la pyniaid da u Bah Kolmen Pohshna Waheh shnong Pdengkarong, bad la ioh ka jingkren lyngkot na u Block Development Officer (BDO), Amlarem Bah G. Mylliem, SDSEO Amlarem Bah C. Lamin, Ex MDC Bah Lamdibok Sumer, kumjuh na u Head Teacher Bah Silverstar Sumer nalor kiwei kiwei.

La pynphuh pynphieng iaka jingialang da ki jingrwai jingshad ba la shim bynta da ki khynnah skul, ki samla ka shnong bad na ki kynhun SHG haka jingdonlang ki nonghikai, ki kmie ki kpa, ki nongialam shnong nalor kiwei kiwei.