Ioh iing treikam ba shi mala ka Jowai Municipal Board

Syllad | The Rising MeghalayaMay 19, 2023

U MLA ka Jowai u Wailadmiki Shylla, Chairman Meghalaya Urban Development Authority (MUDA) ula plie paidbah ïing treikam kaba shi mala jong ka Jowai Municipal Board (JMB) haka sngi Thohdieng.

Ïa kane iing treikam kaba shi mala ka JMB kala tei lyngba Grand-in-aid (Creation of Capital Asset) jong u snem 2021-2022 haka jinglut kaba T.55 lak.

U Wailadmiki Shylla ula ong haki snem kiba la dep ula iohi ba ka Jowai Municipal Board ka long kum kata ka ïing ka bym treikam shuh, na kadaw kiba bun ki jingeh kynthup naduh ka jingbym don ïa u Chairman, ka jingbym ïoh tulop tista ki nongtrei, ka jingthut ki kali kit ñiut bad kiwei kiwei ki jingeh hynrei dei hadien ka jingshimti jong u ha u snem 2018 bad ula buddien ïaki jingeh bad wad ki lad ki lynti kumno ban pynim ne pyntreikam ïaka JMB.

Ula ong ba mynta ka JMB, kala kham kiew ka rukom treikam bad mynta ka kynti da ka jingtei thymmai iaka ïing treikam kan pynsuk iaka rukom treikam bad pynjan shuh shuh ïaka jingai jingshakri ia u paidbah.

Ha kaba ïadei bad ka jaka bret ñiut, ula pyntip ba shen ka Jowai kan sa ïoh ïaka jaka bret ñiut kaba paka bad kane kan rulong lyngba ka jingïatreilang ka ophis JMB, ki Waheh shnong, ki nongshong shnong, ki sengbhalang bad kiwei kiwei kiba don bynta.

U Chairman ka JMB u Lasooki Lakiang ula ïathuh ïaki skhim bapher bapher ka JMB ban ïarap ïaki nongshong shnong jong ka nongbah Jowai bad kumba long mynta ka JMB ka don ïaka skhim shna paiñkhana kaba la mang 12 hajar tyngka shi longïing bad kyntu ban shim kabu ïa kane ka skhim.

Ïaka jingïalang la pynïaid da ka Chief Executive Officer (CEO) Jowai Municipal Board ka Kong DV Lyngdoh haka jingdonlang ki MDC ka JHADC kiba kynthup u Evening Teron, u Ailad Bhoi, Nominated MDC Octomewot Lamin bad ki Waheh shnong na ki shnong bapher ka sor Jowai bad ki nongtrei ka JMB.