Ioh iingskul thymmai ka Tome Memorial HSS Jowai

Syllad | The Rising MeghalayaApril 13, 2024

Ka Jaintia Hills Development Society (JHDS) ryngkat ka jingiatreilang ka Khublei Germany, haka 12 tarik Iaiong ki la plie paidbah iaka iingskul bathymmai kaba don 8 kamra ha Tome Memorial Higher Secondary School Mooralong Jowai.

Ia kane ka iing skul la plie da u kongsan Gerhard Albert uba dei u President ka Khublei Germany, haka jingiadonglang u Most Rev. Ferdinand Dkhar, Bishop ka Jowai Diocese, u Additional Deputy Commissioner ka West Jaintia Hills u Bah F.B. Basan, Director Jaintia Hills Development Society Father Manbha Pakem, Secretary/supervisor Education Department, West Jaintia Hills Bah D. Syngkon, Fr. Martin Shylla Vicar General Jowai Diocese, ki waheh Shnong, nalor kiwei de ki nongshah khot sngewbha.

U Gerhard Albert haka jingkren kum u kongsan ula iaroh ia ka Jaintia Hills Development Society, ka School Managing Committee, ki nonghikai bad baroh kiba donkti ha ka ban pynieng iaka iingskul.

U la kyntu ruh ia ki kynnnah skul ba kin pyndonkam hok ia kane ka shlem jinghikai na ka bynta ka jingmyntoi bad ka lawei babha jong ki. U la pynpaw ruh ia ka jingkyrmen ba kane ka skul kan iarap ban ban pynbha shuh shuh ia ka rukom hikai bad jingpule ba kham shalor.

Shwa kane la ioh ka jingkren maitphang na u Director ka JHDS Fr. Manbha Pakem uba la pynshai halor ki kam bad ki jingtrei kiba ka JHDS ka la leh ban wanrah ia ka roi ka par da ka jingiatreilang kiba bun ki kynhun treimon sngewbha.

U Bishop jong ka Jowai Diocese Most Rev, Ferdinand Dkhar u la kyntu ia ki bor khmih jong ka skul ba kin pynleit jingmut ruh ha ki sap ki talent kiba ki khynnah skul ki don khnang ban wanrah ia ka jingroi jingpar ha baroh ki liang.

La pynphuh pynphieng ia kane ka sngi da ki jingshad bad jingrwai bala iashym bynta da ki khynnah skul jong kane ka skul.