Ioh jaka ri sniang ka Mawsawa

Syllad | The Rising MeghalayaDecember 21, 2022

U Lamphang ka Iingdorbar Thaw Ain ka jylla, u Bah Metbah Lyngdoh, uba long ruh u MLA ka thain haka sngi Balang la plie paidbah iaka Pig Multiplier Farm kaba long ka jaka ri sniang jong ka tnat ri jingri ka sorkar jylla ha ka shnong Mawsawa, Eastern West Khasi Hills District.

Ha kane ka sngi la sakhi ia ka jingiadon ryngkat lang u Syiem ka Hima Nongkhlaw,  u Pa’iem P.M Syiemlieh, u  Deputy Commissioner ka  Eastern West Khasi Hills District, u Bah  W. Nongsiej, u Additional Superintendent of Police ka District,  u Bah H. Kharkongor, i Director ka tnat Animal Husbandry &Veterinary, i Dr (Mrs.)A. Laloo, ki nongtrei jong ki tnat sorkar bapher bapher, ki nongialam shnong bad ki nongshongshnong ka thain.

Ha ka jingkren ka jong u kum u kongsan, u Lamphang ka Iingdorbar Thaw Ain ka jylla, u Bah Metbah Lyngdoh u la pynpaw ia ka jingsngewkmen kaba khraw ban ioh plié ia kane ka jaka ri sniang (Multiplier Pig Farm), ka projek kaba la urlong lyngba ka jingiatreilang jong baroh kiba iadeikam kum ka tnat Animal Husbandry & Veterinary, ka tnat PWD  bad kiwei kiwei, u Sordar ka shnong Mawsawa, ki traijaka bad ki nongshongshnong ka Mawsawa bad u la ong shuhshuh ba kane ka jaka ri sniang ka dei kawei na ki jingpyrshang jong ka sorkar ban kyntiew shuhshuh ia ka roi ka par jong ki paidbah kiba shong ha ki thain nongkyndong lyngba ka kam ri jingri.

U Bah Metbah u la kren ruh halor kiwei pat ki shlem treikam jong ka tnat Animal Husbandry & Veterinary hapoh Eastern West Khasi Hills District kiba kynthup ia ka Vocational Training Centre kaba don ha Mawnai bad na kaba ki nongshongshnong ka jylla ki la ioh jingmyntoi shikatdei eh lyngba ki jinghikai ba ju pynlong hangtei halor ka kam ri sniang, ri syiar bad kumta terter.

Ha kane ka sngi, u kongsan u  la ioh ruh ban sam ia ki khun sniang bad ki khun syiar  hapoh ka skhim Rural Backyard Piggery & Poultry Scheme sha ki nongiohbynta kiba la iawan sha kane ka prokram.

Kiwei kiwei pat kiba la kren ha kane ka sngi ki kynthup ia u  Syiem ka Hima Nongkhlaw, u  Pa’iem P.M Syiemlieh, u  Deputy Commissioner ka Eastern West Khasi Hills District  u Bah W. Nongsiej, i Director ka tnat Animal Husbandry & Veterinary,  i Dr ( Mrs. )A. Laloo, u Sub- Divisional Veterinary Officer, Mairang,  u Dr. D. Lywait bad u  Sordar ka shnong Mawsawa , u Bah Loving Star Mawlong.