Ioh jinghikai ki khynnah skul ka ka St. Michael’s HSS bad ka Balawan HSS halor ka NEP & CUET

Syllad | The Rising MeghalayaMarch 1, 2024

Ka St. Michael’s Higher Secondary School ryngkat bad ka Balawan Higher Secondary Education ki la pynlong ïa ka prokram ba kyrpang na ka bynta ki khynnah klass XI and XII jong kine ki ar tylli ki skul bad kumjuh ruh na ka bynta ki khynnah skul jong ka Mawrong RMSA Higher Secondary School halor ka NEP 2020 bad ka Common University Entrance Test (CUET) ha ka 23 tarik Rymphang 2024.

U riewshemphang uba la ai jinghikai ha kane ka sngi u dei u Convenor jong ka All India Education Forum jong ka jylla Meghalaya bad kumjuh u nonghikai ka St. Michael’s Higher Secondary School, Bah Bisharlang Pyngrope.

Haba batai bad pynshai ïa ki khynnah skul shaphang kaei Ka NEP 2020 bad kaei ka jingthmu jong ka, ula batai bniah iaka Education Policy ha kaba ïa dei bad ka kyrdan ba kham shajrong (Higher Education) bad kiei kiei baroh kiba donkam na ka bynta ki khynnah skul ha kaba ïa dei bad ka jingpule jong ki hadien bad ki la dep pule ia ka Klass 12 katkum ka Education Policy kaba thymmai.

Ha kaba iadei bad ka CUET, ula pynshai kumno ka CUET ka lah ban iarap ïa ki khynnah ban ioh admission ha kino kino ki skul bah ne ki kolej kiba don ka jingpynïasoh bad kino kino ki skul bah ha kylleng ka ri India. Kaei kaba donkam ka long ba ki khynnah ki donkam ban pynkhreh ïa lade na ka bynta kane ka eksam khnang ba kin ïoh lad ban bteng ïa ki jingpule jong ki hadien ba ki la pyndep ïa ka klass 12.

Ula iathuh ba ka National Testing Agency (NTA) kaba pynïaid ïa kane ka CUET ka ai 27 tylli ki subject kiba ngi khot ki subject domain kum ka Accountancy/Book Keeping,  Agriculture, Anthropology, Biology, Business Studies, Chemistry, Computer Science/ Informatics Practices, Economics/ Business Economics, Engineering Graphics, Entrepreneurship, Fine Arts/ Visual Arts (Sculpture/ Painting)/, Commercial Arts,  Geography/Geology,  Home Science, History, Knowledge Tradition and Practices of India, Legal Studies, Environmental Science, Mathematics, Physical Education/ NCC /Yoga, Physics Political Science, Psychology, Sociology Teaching Aptitude, Mass Media/ Mass Communication, Performing Arts bad ka Sanskrit. Shuh shuh i la batai shaphang kumno ban leh ïa ka test bad ïa ki 13 tylli ki ktien kiba ki khynnah ki lah ban jied ha kaba shim bynta ïa ka test.

Ula batai bniah iaki bynta ïa ka test yn sa pyniaid kum ka bynta 1A kaba ka dei ka ktien (languages) kaba don 13 tylli ki ktien, bynta 1B ki ktien (languages) kiba don 20 tylli ki ktien bad bynta 2 kaba ki khot subject domain ne kaei ka subject ba ki khynnah ki kwah ban shim honours bad bynta 3 subject General Test. Ha kaba iadei bad ka jingsiew ki khynnah kin hap ban siew na ka bynta ban thoh ïa ka test bad kiwei kiwei pat ki jingdonkam ba ki dei ban leh shuwa ban register ïa ka CUET. Їa ka prokram la pynkut da ka jingkren ai khublei da u Bah Bonniface Lyngdoh, Principal In charge jong ka Balawan Higher Secondary Education.