Ioh jinghikai ki nonghikai IERC halor ka hok ki khynnah ba kyrpang ha West Jaintia Hills

Syllad | The Rising MeghalayaDecember 13, 2023

Ka District Mission Coordinator, SSA West Jaintia Hills ha ka thong ban kyntiew iaka pule puthi hapoh ka District, haka 13 tarik Nohprah ka la pynlong iaka jinghikai kyrpang iaki Principal, Headteacher jong ki skul ha Inclusive Education Resource Centre (IERS), Mihmyntdu.

Ka thong jong jong kane ka jinghikai ka long ban pynsngewthuh iaki Principal, Headteacher jong ki skul shaphang ka kamram kum ki bor peit bor pyniaid jong ki skul na ka bynta kito ki khynnah ba don haki jingduna dkhot met bad ruh shaphang ka hok jong ki khynnah katkum ka Rights of Persons With Disabilities Act (RPWD) 2016.

U LK Singh, District Co-Ordinator IE, SSA West Jaintia Hills kum u riew shemphang, u ong ba don lai tylli ki skul kiba la mang kyrpang na ka bynta kito ki khynnah kiba don haki jingduna dkhot met kita ki long ka skul ia kito ki khynnah kiba don jingduna ka pyrkhat pyrdain Mental Retardation, ka jingduna haki bor iohsngew Hearing impaired bad ka skul kaba iadei bad kito ki khynnah ki bym iohi Visual impaired.

Hapoh ka jylla ia kum kine ki jait skul ki long kiba dang duna kumta ka buh jingeh bha iaki kmie ki kpa ban phah skul iaki khun jong ki na ka bynta ban ioh iaka jingnang jingstad kumba dawa ka jingling jingman jong ki.

Hynrei wat la katta ruh hapoh ka District kumba shah ka bor ki la pyrshang ban leh ka ba bha tam da kabab uh ha man ki block iaki IE Volunteer bad ki Block Resource Person IE.

Shuh shuh ula batai bniah ruh iaki 12 tylli ki jait jingpang kiba hap hapoh ka RPWD Act 2016 bad ka National Trust Act bad ula kyntu iaki Headteacher/ Principal ban ai mynsiem iaki kmie ki kpa lada jia ba ki don iaki khun kiba don jingduna dkhot met ban pynrung skul ba kin iohlem iaka jingnang jingstad, kaba ka aiñ ruh kala pynkupbor ba kin im laitluid bad ban ioh iaka juh ka hok bad ka lad ban shimbynta haka imlang ka sahlang.