Ïoh jinghikai ki nongrep ka shnong Ksehrynchang ban rep bunjait

Syllad | The Rising MeghalayaAugust 21, 2019

JOWAI: U Ma Dawan Lyngdoh MDC Mynsngat Khanduli ula plie ïa ka jingai jinghikai ban rep bun jait kaba tip kum ka Integrated Farming haka shnong Ksehrynchang, West Jaiñtia Hills kaba la pynlong da ka Society for Urban and Rural Empowerment (SURE) ha ryngkat ka jingïatreilang jong ka Bethany Society lyngba ka Meghalaya State Skill Development Society (MSSDS) haka sngi ba Ar.

U Ma Dawan Lyngdoh haba kren kum u kongsan ula kyntu ïa kito kiba wan ha kane ka jingai jinghikai ba kin shim khia ban pyndep ïa ka training bad ban pyrshang ban rep ïa kaei kaba la ai jinghikai ïaki khnang ba kin nangroi ha ka rep ka riang bad ba kin nang kiew ka ïoh ka kot.

U HH Mohrmen Secretary jong ka SURE ula ong ba yn ai jingai jinghikai haduh 16 jait ki rukom bad ki bynta kiba donkam ban pynroi bad pynbha ïa ka rep ka riang ki nongkyndong. Kan kynthup ïa kata ka rukom rep kaba ki khot ka natural farming bad ka rukom ri jingri pat ka dei kata kaba ki khot ka Bokashi bad nalor kata yn hikai ruh ha kaba ïa dei bad kumno ban pynkylla jingbam ïa ki soh ki pai kiba mih ha ki shnong ki thaw.

Palat lai phew ngut ki longkmie kila ïashim bynta ha kane ka training ban rep bunjait kynthup ïa kam ri jingri kaban neh lai phew sngi lynter.

Naka liang jong u Waheh Chnong ma Malbi Timung ula sngew sarong bad ki longkmie bad samla kynthei jong ka shnong kila long kiba la kloi ban shim ïa kiba kum kine ki jingai jinghikai kiban pynmyntoi ïaki.

Ha kane ka jingïalang plie la ïadon ryngkat ruh u ma L. Niang uba long u Assistant Director Horticulture West Jaiñtia hills, u Dr D. Paswet u Senior Scientist na KVK, Jowai, u S. Slong BPM ka MSRLS bad ïa ka jingïalang la pynïaid da u Mardaoo Mynrchiang u dkhot jong ka SURE bad ïa ki kyntien ai khublei la ai da u Habandajop Lyngdoh naka SURE.