Ïoh jinghikai ki nongri jingri ban pynbun iaka jingmih dud bad ka doh ha East Jaintia Hills

Syllad | The Rising MeghalayaNovember 3, 2021

Ka Meghalaya Veterinary Services Association (MVSA) Jaintia Hills District Unit ban pynshlur iaki nongri jingri ban pynmih bun ka dud bad ka doh kala pynlong ka jingai jinghikai haka shnong Latyrke, East Jaintia Hills haka sngi Balang.

Ia kane ka jingai jinghikai kaba la tip kum ka Farmers Training Cum-Workshop la pynlong Multi Purpose Hall Latyrke da ka jingiatreilang ka tnad District Animal Husbandry & Veterinary Officer jong ka East bad West Jaintia Hills District.

Haduh 50 ngut ki nongri jingri ka East Jaintia Hills kila wan iashimbynta ha katei ka jingai jinghikai ka MSVA.

Ha kane ka jingai jinghikai la pynsngewthuh iaka jingdonkam ban pynmih bun ka dud bad iaka dohsniang ban pynbiang iaka jingdonkam ki nongbam doh haka district bad ka jylla baroh kawei.

U Dr DI Kjam, District AH & Veterinary Officer West Jaintia Hills uba long ruh u Chairman MVSA-JHDU ula pyniaid iaka jingialang haka jingiadonlang u Dr R Pyrtuh BDO Saipung bad na u Waheh Shnong ka Latyrke u Bah R. Malang nalor kiwei kiwei.

U Dr PB Nongpluh District AH & Veterinary Officer East Jaintia Hills, Khliehriat haka jingkren ula ong, ha Meghalaya ka jingbam doh sniang ka long 15 hajar metric ton katba ka jingpymmih ka long tang 6 hajar tam bad haba ïadei bad ka pylleng ula ïathuh ba ha Meghalaya uwei u briew u ïoh ban bam tang 38 tylli ki pylleng haka shisnem kata ruh ki pylleng kiba wan na bar jong ka Jylla.

Ula kyntu ïaki nongri jingri ha East Jaintia Hills ban shim kabu ïa kane ka jingai jinghikai khnang ba kin nanglah shuh shuh ban kyntiew ïaka kam ri jingri jong ki.

Ki riew shemphang kiba la ai jingbatai ki long ka Dr E Laloo, Dr P Sumer, ka Dr F. Dhar, ka Dr R Talang kiba batai halor ka jingpymmih dud masi, ka rukom ri sniang, ri syiar bad ka rukom sumar bad ïada na ki jingpang bad kiwei kiwei nalor ki skim sorkar kaba kynthup iaka Milk Mission, Piggery Mission bad kiwei kiwei ki skim sorkar.

La ai jinghikai ruh halor ka Artificial Insemination ne ka rukom pynkha pynroi iaki khun masi, ki sniang ne ban pynroi iaki jingri jindup khnang ban pynbiang iaka jingdonkam iaka dud bad ka doh.