Ioh jinghikai ki nongshong shnong ka Amkoi halor ka kam jngohkai bad shongkha khynnah
Ka Amkoi Agro & Eco Friendly Tourism Promotion Development Society Ltd, Amkoi kala ai jinghikai iaki khun samla kynthei bad shynrang jong ka shnong Amkoi ban kyntiew iaka kam jngohkai bad ban kiar na ka jingshongkha khynnah nalor kiwei kiwei.
Ia kane ka jingai jinghikai ka Amkoi Agro & Eco Friendly Tourism Promotion Development Society Ltd kala pynlong haka sngi Palei ka taiew kaba ladep.
Ki riewshemphang kiba kynthup ia u Lah Sumer ula pynsngewthuh halor ka khuid ka suba, u Romsing Pohktai halor ka mariang bad ka jingmyntoi, u Barister Riahtham halor ka kam jngohkai.
Shuh shuh u Treiborlang R Suchen general secretary JSU ula pynsngewthuh halor ka jingkongsan ka pule ka puthi kaba long ka atiar kaba lah ban rah shaba leit ba wan bad kyntu iaki samla kiba pep skul ban bteng iaka jingpule bad ban pynshlur iaki kmie ki kpa ban phah skul iaki khun ki kti khnang ba kin long ki myntoi ka imlang ka sahlang.
Dr Shemphang P Hayong ila pynsngewthuh halor ka jingma na ka jingshongkha khynnah. Ula kyntu iaki khynnah ban kiar iaka jingshongkha khynnah kaba long beaiñ bad ban lait na kino kino ki jingeh haka imlang ka sahlang.
Ha kane ka sngi la ioh jngkren ruh na u secretary ka society u BL Pohti, Waheh Shnong u Aibor Lamin nalor kiwei kiwei.
La iashimbynta ha kane ka jingai jinghikai naduh ki khynnah skul, Asha, Anganwadi, Musical club Amkoi, Ka Amkoi Sports club, ki paidbah, ki SHGs, ki nongtrei job card bad kiwei kiwei.
Facebook
Instagram
Youtube
Twitter
Leave a Reply