Ioh jinghikai ki sengbhalang halor ka jingpang khlam COVID-19 ha Laskein Block

Syllad | The Rising MeghalayaJune 28, 2021

Ka ophis jong u Block Development Officer, Laskein C&RD Block haka jingiatrelang bad u Medical Health Officer, Laskeiñ CHC haka sngi Nyngkong kila ai jinghikai bad iathir jingmut halor ka khlam COVID-19.

Ia kane ka jingialang la pynlong ha ophis u BDO bad la wan ban iashimbynta da ki nongialam sengbhalang bapher bapher kiba kynthup iaka JSU, JSM, HYC, FKJGP, KSU kiba don ki shnat treikam ha Laskein Block.

U Dr. Ebormi Lytan, Medical & Health Officer, Laskein CHC ula pynshai halor ka jingpang khlam bad halor ka jingai tika COVID-19

Hadien pat kala don ka jingiathir jingmut bad kala don ruh ka jingai jingmut na ki sengbhalang ba kam dei ban long salorsar ka rukom ai tika. Kine ki nongialam sengbhalang kila pynpaw ba ki kloi ban iatreilang na ka bynta ban iakhun iaka khlam COVID-19 bad ban pynsngewthuh paidbah ia ki adong adit COVID-19 sha ki paidbah.

U Dr. Brightstar Langbang, BDO Laskein ula khot ka jingiatrelang jong kine ki seng bapher bapher bad ula kyntu ba kum ki nongialam ki dei ban mih shakhmat ban ai tika COVID-19 ba kin long ki nuksa ia kiwei khnang ban tem iaka jingpur ka jingpang khlam hapoh ka block, ka district hi baroh kawei.