Ïoh jinghikai kynshew pisa & jingai sngewbha ki nongshet ja sngi

Syllad | The Rising MeghalayaJanuary 21, 2020

JOWAI: Ki nongshet ja sngi ïaki khynnah skul kiba hap hapoh ka synjuk All Jaiñtia Mid Day Meal Workers Union kila ïoh jinghikai ban kynshew pisa ha ki bank bad ki tiar jingai sngewbha sha ki khun ki kti jong ki haka jingai jinghikai ïaka skim Mid Day Meal Scheme bad ka Saving Bank Account kaba long ha Loompyrdi Iongpiah, Jowai haka sngi ba Ar.

Ïa kane ka jingai jinghikai la pynlong da ka All Jaiñtia Mid Day Meal Workers Union, Jowai haka jingïatreilang bad ka office Sub Divisional School Education (MDM scheme), ka Meghalaya Co-operative Apex Bank Ltd Jowai Branch bad ka Seva Bharati Meghalaya.

Ha kane ka jingai jinghikai la ïadonlang U Ma Longda Bamon uba dei peit ïa ka Mid Day Meal Scheme ha West Jaiñtia Hills District, Kong Orida Lato Manager MCAB, u Damut Dkhar na ka Seva Bharati Meghalaya, president All Jaiñtia Muster Roll Workers and Labour Union U Ma KL Pariat bad kiwei kiwei.

U Ma Longda Bamon, ula ong kane ka jingai jinghikai kadei na ka bynta ba ki nongshet ja sngi iaki khynnah kin sngewthuh ïaka jingpynïaid ïaka skim Mid Day Meal ha skul khnang ban myntoi ki khynnah skul. Ki nongshet ja sngi ki hap ban shimkhia ban ai ka bam ka dih ka khuid kaba suba ïaki khynnah ba kin ïoh ka bor met kaba khlain. Ki Nongshet ja sngi ki hap ban don ka bank account ban suk ban thep pisa ne honorarium haka account jong ki namar ba naduh u bnai Rymphang yn sdang ban thep pisa ha ki ban account jong ki nongshet ja sngi.

Ka Kong Orida Lato, Branch Manager ka MCAB, Jowai Branch kala ong baka MCAB kala leit ai jinghikai ha manla ki jaka halor ka jingkynshew pisa bad sei pisa ka juk mynta kaba da ka kor ki bor. Kala ong ba ka jingkynshew pisa kalong kaba kongsan bha lada dei uba ïoh ne uba duk bad kumta ka donkam ïa manla uwei pa uwei ban don plie account ha ki bank ban kynshew ïaka pisa ban suk haba don ki kam kiba kyrkieh. Kala batai ruh ïaki jingdonkam ban plie account bad ki jingïarap ba lah ban ïoh na ki bank.

U Ma Damut Dkhar ula pynshai halor ka jingtreikam ka seng Seva Bharati Meghalaya. Ula ong ba kane ka seng kadei ka seng treimon sngewbha ban ïarap ïaki briew kiba wan na ki longïing baduk ban ïarap ïaki ban ïoh ïala ka jong ka hok haka imlang ka sahlang naduh ban ïoh ka jingnang jingstad, ka koit ka khiah bad roi ka par jong ki briew.

Ka Seva Bharati Meghalaya ha kane ka prokram kala ai sngewbha haduh arphew tylli ki pla skul (Bags), sawphew tylli ki kopi, arphew tylli ki let, ki rubber bad kiwei kiwei ki tiar sha u Ma KL Pariat President AJMRWLU bad la sam ruh ha ka juh ka sngi sha ki khynnah skul kiba wan na ki long ïing kiba duk kiba kyrduh kum na ka shnong Mihmyntdu, Lad Mukhla, Wahïajer, Ialong, Sohmynting, Jowai bad  Mynso.

Ha kane ka juh ka sngi ka MCAB kala plie account ruh ïaki nongshet ja sngi. Ka synjuk jong ki nongshet ja sngi kila dep pynlong ia kane ka jinghikai ha Lad Mukhla bad kin pynlong ia kane ka juh ka jinghikai ha Raliang haka 27 tarik une u bnai.