Ioh jinghikai shna sabon bad jingbam ki 7 shnong na ka JHDS

Syllad | The Rising MeghalayaNovember 2, 2022

Ban kyrshan bad ban plie lad iaki samla kynthei bad shynrang khamtam kiba la don haki kynhun Self Help Group (SHG), ka Jaintia Hills Development Society (JHDS) kala ai ka jinghikai kaba 15 sngi lynter iaki nongshong shnong jong ki 7 tylli ki shnong ha West Jaintia Hills District.

Ka JHDS kala pynlong ia kane ka jingai jinghikai kaba la tip kum ka Residential Skill Training naduh 17 tarik Risaw haduh 1 tarik Naiwieng ha Samanlang Socio Cultural Pastoral Centre, kaba don ha Bishop House, Lumbih Syntu, Mihmyntdu, Jowai. La iatreilang ban pynlong ia kane ka jingai jinghikai da ka ophis u Deputy commissioner ka West Jaintia Hills District.

Ha kane ka jingai jinghikai halor ka kam Shna Sabon bad Shna jingbam bad la wan iashimbynta da ki samla kynthei bad shynrang na Khlokynring, Shangpung Khliehrangnah, Mynska, Saphai, Thadmuthlong, bad Mustem.

Hadien ka jingai jinghikai la pynlong iaka kynja eksamin kaba thoh bad kaba hap ban pyni da ka kam ne ka practical eksam.

U Fr. Manbha Pakem, Director Jaintia Hills Development Society (JHDS), Kong Wanmon Tang Master Trainer on Food Processing bad u Bah Macsal Jones Nongsiej, Master trainer ka Soap Making haba kren kila ai mynsiem ia baroh kiba wan shah hikai ban ki sdang noh iaka kam khnang ba kin iohi ia u soh jong ka jingtreikam jong ki.

Haba pynkut ia kane ka jingai jinghikai la pynlong prokram ba lyngkot kaba pyniaid da ka Kong Ridu-I Passah. Ha kane prokram ban pynbyrngia la don ka ka cultural prokram kaba kynthup iaka jingshad tynrai bad ki drama ba la iashimbynta da ki nongshah hikai.