Ioh jingithuh ka jaka test snam ka Woodland WK Hospital, Jowai na ka NABL

Syllad | The Rising MeghalayaDecember 22, 2023

Ka Woodland WK Hospital, Sabahmuswang, Jowai, kala jam pat sha uwei u mawjam ba tang hapoh 3 lai snem ka jingshakri jong ka, kala ioh iaka jingithuh na ka National Accreditation Board for Testing and Calibration Laboratories (NABL) ha kaba iadei bad ka jaka test snam ka jong ka, ba ka long kaba bit kaba biang kaba lah ban shem iaki jingpang haka por kaba biang bad ban ai jingiada naka jingpang bad kiwei kiwei.

Kumban shu pynkynmaw ka Woodland WK Hospital kaba la sdang u Dr. Werlok Kharshiiing kala sdang ban ai jingshakri iaka rilum Jaintia naduh 15 tarik Nailur 2020. Ka la ioh ruh iaka jingiathuh na ka National Accreditation Board for Hospitals & Healthcare Providers (NABH) ha u snem bala dep.

Ka NABL haka 24 tarik Naiwieng 2023 katkum ka LAB-ID NABL/M-3987 kala pynpaw ba ka sngewkmen ban pyntip bala ai ka jingmynjur ban ithuh ne accreditation iaka Woodland WK Hospital ha kaba iadei bad ka ISO 15189:2012.

Kane ka jingithuh kaba ka Woodland Hospital ka la ioh pdiang, ka long ha kaba iadei bad ka jinglah ban pynbiang halor ka jingleh ia ki test iaka snam, kata kum ha ka “Clinical Biochemistry, Clinical Pathology bad Hematology.

Kane ka Accreditation Number MC-6140 kan treikam naduh  23.11.2023

Ka dei ka jingkitkhlieh jong ka Laboratory ban bud ryntih iaki kyndon aiñ jong ka sorkar, ka iingbishar bad ki bor dei khmih katkum ki jingdonkam naka por sha ka por.

Kum ka laboratory kaba la ioh jingithuh, ka Laboratory ka dei ban pynthikna ban bud beit ryntih ia ki kyndon ba la buh kumba la kdew ha ka  NABL 131 ha baroh ki por kiba kane ka jingithuh ka dang bteng ban treikam.