Ioh jingithuh ka Nazareth Hospital na ka NABH namar ka ai jingsumar ba bha tam

Syllad | The Rising MeghalayaAugust 23, 2023

Ha uwei pat u mawmer jong ka jingjop ha ka liang ki lad aijingsumar ha ka nongbah Shillong, ka Nazareth Hospital ka la ioh ia ka jingithuh lyngba ka National Accreditation Board for Hospitals (NABH) halor ka rukom aijingsumar kaba bha tam.

Kane ka jingjop ym tang ba ka kynthup ia ka Nazareth Hospital hapdeng ki kynhun ba la jia napdeng kumba 1000 tylli ki jaka aijingsumar hapoh ka ri, hynrei ruh ka pynpaw ruh halor ka jingtrei shitom bad ka jingkut jingmut ha kaba iadei bad ka jingshngain jong ki nongpang bad ka rukom aijingsumar kaba bha tam.

Na ka liang ki bor pyniaid ka hospital lyngba une u kyrwoh ki pyntip ba ia kane ka jingithuh la ioh pdiang hadien ka jinglah ban pyndep ia kiba bun ki bynta jong ki jingtreikam ba bha tam, kiba pynpaw ruh halor ka jingtrei borbah jong kane ka hospital ha kaba iadei bad ki lad aijingsumar. Kane ka jingithuh ka ban treikam na ka bynta saw snem kynthih, kata naduh ka 27 tarik u Naitung 2023 haduh ka 26 tarik Naitung 2027. Ka jingiaid lynti na ka bynta kane ka jingithuh ka la sdang ha u snem 2016 kaba la pynlong ia ka Nazareth Hospital kum kawei na ki jaka aijingsumar kaba nyngkong eh ha Meghalaya ka ban ioh rung na ka bynta kane ka jingithuh ne entry-level certification.

Nalor kiba bun kiwei pat ki jingpynbit pynbiang ha ki lad aijingsumar kiba kongsan hapoh kane ka hospital, kawei na ki jingpyniasoh ba kongsan tam ha ka jingshakri jong ka Nazareth Hospital ka dei ka jingpynioh ia ka MRI (Magnetic Resonance Imaging). Kane ka la iarap shibun halor ka jinglah ban ai ia ka jingsumar kaba kham biang shuh shuh bad ban lah ban tuklar ha ka por kaba biang halor ki lad aijingsumar.

Nalor kane ki jingtreikam hapoh la laboratory jong ka hospital ruh ka la ioh ia ka jingithuh na ka NABL, kaba la sdang lyngba ka biochemistry bad ka pathology ha u snem 2017.