Ioh jingithuh ki shnong khappud Assam Meghalaya; ai sanad ka JHADC sha ki 21 ngut ki waheh shnong

Syllad | The Rising MeghalayaAugust 20, 2024

Hadien ba ka Jaintia Hills Autonomous District Council (JHADC) kala pynkhie im biang iaka Elaka Labang Nongphyllut kaba bun na ki shnong ki hap ha ka jaka ba iakhajia pud bad ka Assam Meghalaya, ka Executive Committee kaba ialam da u ma Thombor Shiwat kala ai sanad iaki 21 ngut ki waheh shnong ban pynkup bor iaki kum ki nongialam shnong haka 19 tarik Nailar.

Ia kine ki sanad ka JHADC haka jingialam u ma Thombor Shiwat kum u CEM kala aiti haka jingialang kaba lyngkot kaba long ha ha conference room ka JHADC. La iadonlang bad u EM Political ma Finelyness Bareh, ki ophisar ka JHADC bad kiwei kiwei.

Kum ban shu pynkynmaw ba ia ka Elaka Labang Nongphyllut la mynjur ruh ban pynkhie im iaka hapoh ka iing dorbar kaba long ha bnai Naiwieng 10 tarik 2023.

Ka Executive Committee JHADC katkum ka notification no.JHADC/POL/23/2021/6 tarik 8/11/2023 hapoh ka kyndon ain katkum ka section 14(1) jong ka Jaintia Hills District (Establishment of Elaka and Village and Election Appointment, Powers, Functions and Jurisdiction of Dolloi/Sirdar and Waheh Shnong) Act, 2015, ka la thung ia u Prolin Samayang kum u Acting Dolloi jong ka Elaka Labang Nongphyllut. Ka konsil kala pynkup bor bad iktiar ban treikam kum u Acting Dolloi jong ka Elaka Labang Nongphyllut tad haduh bala pynbna da kumwei.

U Dolloi uba pura bad u khatduh jong ka Elaka Labang Nongphyllut u dei u Ma Honriwell Pyrphet bad la thung ia u ha ki snem 1960 bad u la khlad noh na kane ka sla pyrthei kumba 40 snem tam eiei. Hynrei ha ka por jinglong Dolloi jong u ki bor pyniaid jong ka Karbi Anglong Autonomous Council ne ka KAAC kim treh satia ban ithuh ia ka bor jong u namar kim don satia kata ka jingsynshar Dolloi.

Ha ka jingiakren bad u Ma Thombor Shiwat hadien ba la wai ka jingialang ula iathuh ba hapoh kane ka Elaka Labang Nongphyllut la don 36 tylli ki shnong bad mynta ka sngi la ioh ban ai pynkup bor iaki 21 ngut ki waheh shnong bad ia kiwei pat ki waheh shnong ka JHADC kan sa pynkup bor haki sngi ban wan.

“Ka jingai sanad ia kine ki shnong ka long halor ka nongrim ba ki kwah ban ithuh noh iaki da ka sorkar Meghalaya” la ong u Ma Thombor bad bynrap ba ka konsil kala iaid lynti haba iadei bad kane ka kam mynta la ar snem bad halor kane kala wanrah ruh da ka resolution hapoh ka iing dorbar ban pynim biang ia kane ka Elaka.

“Ka jingpynbeit pud hapdeng ka Meghalaya bad Assam kam pat dep bad ngam pat ong ne pynthikna la kine ki shnong kin hap sha Meghalaya ne sha Assam namar ka kam pynbeit pud ka dang sahteng hynrei ka jingkwah jong ka konsil bad ka jingkwah jong ki 36 shnong ka long ba ka Elaka Langbang Nongphyllut kan wan sha Meghalaya”, la ong u Ma Shiwat.

U Ma Shiwat ula pyntip ruh ba ki nongshong shnong katei ka Elaka kila kyntait lut ia baroh ki kam pynroi ne kino kino ki jingiarap bala tyrwa da ka sorkar Assam bad kane ka pyni shisha iaka jingkut jingmut bad ka jingthrang jingangnud jong ki ban don sha Meghalaya.

Ula bynrap ba ka konsil ka don ka jingkyrmen ba ka sorkar kan sngap iaka jingkwah jong kine ki 36 shnong namar hapoh katei ka Elaka la shong la sah tang da ki jaitbynriew Pnar.