Ïoh jingkieng doi doi ka shnong Musiaw ba shongdor T.23 Lak tam

Syllad | The Rising MeghalayaAugust 25, 2019

JOWAI: Ka shnong Musiaw kaba hap hapoh ka Elaka Shilliangmyntang kala ïoh ïaka jingkieng doi doi kaba thymmai kaba shongdor T.23 Lak tam.

Ïa kane ka jingkieng la pyntrei lyngba ka skim Mahatma Gandhi National Rural Employment Guarantee Scheme (MGNREGS) jong u snem 2018-19 bad 2019-20.

Ka Musiaw VEC kala trei ïa kane ka jingkieng tang hapoh shi snem. La sdang trei naduh u bnai Nohprah 2018 bad la pyndep ha u bnai Jylliew 2019. Ka Musiaw VEC, kaba hap haka Laskeiñ C&RD Block.

Kane ka jingkieng doi doi ka don ha Wah Mynriang haka shnong Musiaw, West Jaiñtia Hills District.

Ki Shnong ba ïoh myntoi na kane ka jingkieng ki kynthup ïaka shnong Musiaw, Umsalang, Latymphu, Moobandu, Mynkrem, Thadbamon & Pdeiniadaw.

Na kane ka jingkieng ki paid nongshong shnong katei ka thain ki leit rep leit riang bad leit iew leit hat kumjuh ha kaban leit shim dawai sha Namdong PHC haba ïaid da ka kjat ong u Waheh Shnong ka Musiaw u ma Deimonmi Tang.

U Ma Deimonmi ula pynpaw ka jingsngewnguh ïa u BDO Laskeiñ u Bah FB Basan, u MDC Rudaioo Tang, Project Director, DRDA West Jaintia Hills bad ïa ki nongshong shnong ka Musiaw baroh kiba la ai ka jingïatreilang ban pyndep ïaka jingtei ïaka jingkieng kaba long ka jingkyrkhu ïa ki paidbah ka thain.