Ioh jingkoit u rangbah na ka jingpang bampong lyngba ki dawai kynbat

Syllad | The Rising MeghalayaDecember 4, 2023

Uwei u rangbah uba kyrteng u Bah Blingstar Snaitang na ka shnong Mawkadiang, Nongstoin, WKHD u la phla ba u la ioh ia ka jingpang bampong (Cancer) ba shyrkhei ha u bnai Jylliew 2016, kata ka jingat ba heh ha u ryndang (Left Neck Node) uba heh jan kat u kwai.

U la iathuh ba u la phah ban leh test ha Woodland Hospital ha ka 21.06.2016, bad hadien ba ba la ioh ia ka report, ki doktor ki la iathuh ba ka dei ka jingpang bampong, bad ka report ka thoh Metastatic Squamous cell carcinoma, ha kaba na liang ki doktor ki la ong ha u ba un hap ban shah puid noh, bad ka dor ka long kaba rem.

Hadien kane une u rangbah u la ong ba kila iakren ha la iing ha kaba ki la rai ban ym shah puid hynrei ban phah sumar kynbat na u Dr. Boss L. Myrthong ha Nongstoin namar ki la ioh jingtip ba u la lah ban pynkoit ia kiba bun ki nongpang bampong da kaba sumar lyngba ki dawai kynbat.

U Bah Snaitang u la iathuh ba u la leit rah ia kane ka report ba la ioh napoh Woodland Hospital sha u Dr. Boss uba la pynpaw ba katkum ka report ka dei shisha ka jingpang bampong.

Hadien ba la bishar bniah ia ka report na ka liang u Dr. Boss u la batai ba u dei ban shah sumar haduh lai snem ne palat ban lah ban pynkoit pat ia kane ka jingpang bampong, kata da kaba kyntu ruh ia u ba u dei ban sangeh shisyndon ban bam doh, ban dih dud, bam kwai bad ban dih duma sikret.

Da ka jingshaniah une u rangbah u la mynjur bad sdang ban shah sumar ha u Dr Boss haduh lai snem pura kumba la batai da kaba kiar lut ia ki jingbam ba la khang pyrshah kat haduh ba un da ioh ia ka jingkoit kaba pura na kane ka jingpang bampong kat haduh kine ki sngi.

Une u rangbah u la ong ruh ba kane ka jingpynpaw ka jong u ia la ka jong ka jingshem ka long khnang ban tip paidbah bad khnang ba kan long ruh ka jingmyntoi ia kiwei pat.