Ïoh jingmyntoi palat 1300 ngut na ka Health Mela ha Iooksi

Syllad | The Rising MeghalayaJuly 6, 2019

JOWAI: Palat 1300 ngut ki paidbah na ki 22 tylli ki shnong ki la ioh jingmyntoi na ka Health Mela ba la pynlong haka shnong Iooksi haka sngi Thohdieng.

Ia kane ka Health Mela la pynlong da ka District Legal Services Authority West Jaintia Hills ryngkat ka jingiatreilang bad ka ophis u District Medical & Health Officer West Jaintia Hills. Ka phang pdeng kane ka jingai jingsumar ei ka dei ka “Universal Health Coverage”.

Ki doktor jong ka Jowai Civil Hospital, Ialong kila ai ka jingsumar bad dawai ei ïaki longkmie, rangbah bad ki kynthei khynnah katkum ka jingpang naduh ki khmat ki khmut, skhor, bniat bad ryngdang bad kiwei kiwei. La don lang ryngkat ruh ki doktor ba ai dawai Ayurvedic bad Homeopathic.

Ïa kane ka jingai jingsumar la pynlong da ka District Legal Services Authority West Jaintia Hills bad ka tnad ka koit ka khiah ban pynshai ïa u paidbah ban ïakhun ïaka jingduk bad ka jingpang jingshitom bad ban tip ïaki lad kumno ban myntoi na ki skim sorkar halor ka jingdonkam ba kongsan ki briew haka jingim la ha sor ne nongkyndong naduh ka rukom bam, ka jingkongsan ka rukom bam bad ka trei ka ktah.

Shuwa ban sdang ka jingai jingsumar ei la don ka jingïalang kaba lyngkot kaba pyniaid da u Bah DS Marbaniang Secretary DLSA bad la ioh iaka jingkren na u Dr. KC. Ajar District Medical Health Officer, ka Dr. Hellen Uriah, ka Dr. JN Shullai, u Dolloi ka Elaka Raliang u Ma Chawas Lyngdoh bad u Waheh ka Iooksi u Bah C. Tangliang.