Ioh jingmyntoi palat 2600 ngut ki khynnah pule ka jylla na ka SPARK

Syllad | The Rising MeghalayaAugust 23, 2024

Ka tnat treikam pule puthi jong ka sorkar jylla Meghalaya lyngba ka Samagra Shiksha, ka la dep ban pynlong ia ka SPARK prokram na bynta palat 2600 ngut ki khynnah pule ha kylleng ka jylla. La sdang nyngkong ha ki katto katne tylli ki skul ha u bnai Iaiong bad haduh kane ka sngi la lah ban pyndep ha 15 tylli ki skul ha baroh 12 tylli ki distrik.

Ka jingthmu jong ka SPARK (School Programmes in Articulation, Resilience and Kindness) ka long ban sam jinghikai hapdeng ki khynnah skul ha kaba ia dei bad ka jingshlur (confidence), ka rukom kren bad iadei parabriew (communication and interpersonal skills), ka STEM (Science, Technology, Engineering & Mathematics) awareness bad ka jingbha jingmiat (wellbeing).

Ia ka SPARK la plie pyrda ha u bnai Lber mynta u snem da u Swapnil Tembe, IAS, State Project Director, Samagra Shiksha jong ka sorkar Meghalaya. Ha ka jingkren jong u hapdeng ki khynnah nongiashimbynta ha kawei na ki skul, u la pynpaw ia ka thong jong ka SPARK da kaba ong, “Phi don ia la ka jong ka jong ka thong ha ka jingim jong phi. Kam pher lada phi jied kano kano ka laiñ jingpule lane jingtrei jingktah. Kaba donkam nyngkong kadei ka jingshlur bad jingngeit ha lade ba phi lah ban leh ia ka. Kam dei kaba suk bad ka shim por ban pyntbit ialade ha kane ka liang hynrei nga kmen ban iohi ba phi la ia sdang ban kren, ban kylli jingkylli bad ban pyntbit ialade ha ka rukom kren rukom khana.” U la ong shuh shuh, “Ban long kiba eh mynsiem haba iakynduh ia ki jingeh ka long kaba donkam namar kan iarap ia phi ba phin tur shaphrang khlem duh mynsiem. Bad ha ka jingiaid lynti jong phi, donkam ruh ban long ki briew kiba bha namar dei tang lyngba ka jingleh bha iwei ia iwei ba ka pyrthei hi baroh kawei kan roi kan par. Ha ka rta jong phi, ka dei ka por bad ka ïa kaba dang biang eh ba phin pyntbit ialade ha kine ki liang.”

Ha ka 16 tarik u Nailar, la pynkup burom bad sam syrnot ia palat 700 ngut ki khynnah pule ha 4 tylli ki skul hadien ka jingpyndep jong ki ia ka prokram. Kine ki kynthup ia 142 ngut na Ampati Government Higher Secondary School, Ampati bad 108 ngut na Chiringpara RMSA Secondary School, Chiringpara ha South West Garo Hills, 280 ngut na Government Girls’ Higher Secondary School, Jowai ha West Jaintia Hills bad 185 ngut na Alpha English Higher Secondary School, Nongpoh ha Ri Bhoi.

U samla Eprin G Marak, Klas 9, Ampati Government Higher Secondary School, u la sam ia ka jingshem jong u lyngba ka prokram da kaba ong, “Nga la ioh shibun ki jingmyntoi na ka SPARK khamtam ha ki jinghikai tynrai kiba iadei bad ka jinglongbriew manbriew (Values) bad kren paidbah (Public Speaking). Ngam ju nud wat tang ban ieng ha klas. Bad lada nga kren ruh, ngam nang ban ieng ha ka rukom kaba dei. Hynrei mynta ka sngi nga ieng hangne hakhmat jong phi baroh bad nga pyrshang ban kren shai bad da ka jingshlur lyngba ki jinghikai ba nga ioh na kane ka prokram.”

U samla Lambhameki Marwein, Klas 8, Alpha English Higher Secondary School, u la ong, “Nga ju pyrkhat ba nga dei u khynnah uba shlur hynrei haba ka SPARK ka la wan sha skul jong ngi, nga shem ba dang bun kiei kiei ba nga dei ban ioh jinghikai bad pyrshang. Nga ai khublei ia ki Trainer kiba la iarap ia nga ba ngan dang long shlur man ka sngi.”

Ka Hema Nayak, IAS, Deputy Commissioner, South West Garo Hills, ka la don ryngkat lem ha ka prokram pynkut ha Ampati bad ka la sam ia la ka jingkren hapdeng ki khynnah nongiashimbynta. “Ki prokram kum ka SPARK ki ai ha ki skul jong ki shnong bad distrik kyndong kum jong ngi ia ka shlem kaba donkam eh ba ngin ioh diang ia kum kine ki jinghikai,” ka la ong, “Ki jingjynjar kiba phi shem ki long ki juh kiba ki khynnah ha kiwei ki skul ruh ki mad. Phi hap shim kabu ia ki lad ki lynti kat kiba phi ioh ban pynjanai ia la ka jingnang stad,” ka la ong shuh shuh.

U Abhilash Baranwal, IAS, Deputy Commissioner, Ri Bhoi, u la don lang ha ka prokram ha Nongpoh bad u la ong, “Ka jingbabe kaba wan na ka jingkynran dien ha ka por kaba donkam namar ka jingsheptieng, ka kham khraw ban ia ka jingsngewrem kaba phi shu mutdur ha lade. Baroh na ngi ngi syier ban kren paidbah, hynrei ka jingshlur ka mut ba ngi pdiang ia kata bad ngi tur shaphrang.” U la ai jingmut ruh ba kane ka prokram kam dei ban shu kut noh kumne hynrei ba ka dei ban bteng lyngba ki jingpyrshang ban buddien bad lamlynti ia kine ki khynnah kiba la ioh mad ia kane ka prokram. “Kine ki jingpyrshang kin long kiba iarap shikatdei eh ha ka jingpynsan ia ki samla ba kin long kiba shemphang bad ki ban nohsynñiang sha ka jylla bad ka ri hi baroh kawei,” u la ong shuh shuh.

Ka Baiantimon Blah, MCS, Additional Deputy Commissioner, West Jaintia Hills, bad ka Ruby Zothan Puii Das, District School Education Officer, Ri Bhoi, ki la ia don ryngkat lem ha ki prokram ha Jowai bad Nongpoh. Ki dkhot jong ka AVENUES Team ruh kaba la pyntyllun ia ka SPARK ha kylleng ki skul bad distrik ha ki bnai ba la dep ki la don ryngkat lem.

Ban buddien ia ka jingmyntoi jong ka SPARK la pyndonkam da ar (2) jait ki rukom khmih bniah (assessment) – kawei ha kaba ki khynnah ki khmih ialade pyrshah ki mat jingkdew kiba ia dei ba ki jinghikai lyngba ka prokram (programme self-assessment), bad kawei pat ba la khmih bniah da ki nonghikai jong ki (teachers’ observations). Ia kane ka jingkhmih la pynlong arsien, kata ha kaba sdang ka prokram bad kawei pat ha kaba kut (pre and post). Ia kane la pynlong ha baroh ki skul kiba ia shim bynta. Ia ka kaiphod ba kham bniah halor kine yn sa pyllait da ka seng ai kam (agency) kaba pyntreikam ia ka SPARK sha ka tnat treikam pule puthi.