Ioh ka East Jaintia Hills iaka Bokashi Unit ba nyngkong eh ban ri jingri

Syllad | The Rising MeghalayaFebruary 3, 2025

Ka East Jaintia Hills District kala shim iaka sienjam kaba khraw ban kyntiew iaka kam ri jingri da kaba plie ia ka Bokashi Unit kaba nyngkong eh haka shnong Jalyiah.

Ia kane ka Bokashi Unit la shna khnang ban kyntiew ia ka rukom ri jingri kiba iadei bad ka mariang bad kiba khuid, kane ka unit ka kynthup ia ka jaka ri sniang bad ka jaka ri syiar.

La plie paidbah ia kane ka Bokashi Unit da u Deputy Commissioner ka East Jaiñtia Hills District, u Shivansh Awasthi, IAS haka 3 tarik Rymphang. La iadonlang ruh u T. Shylla uba dei u BDO Khliehriat C&RD Block, Kong Pynhunlang War, DPM jong ka DPMU MLAMP East Jaintia Hills, ki nongtrei, bad ki nongialam ka Jalyiah IVCS ba kynthup ia u president, u secretary bad kiwei kiwei.

Ka Bokashi ka dei ka rukom ri jingri kaba sdang na Japan kaba pynleit jingmut ha kaba pynkhuid ia ki jaboh jabaiñ ha ka sem ri jingri. Ka iarap ban pynkhuid ia sem ri jing ri, ka pynduna ia ki jingsma, kyntiew ruh iaka jingpynkha ne pynmih iaki jijngri bad ka pynbha ia ka khyndew.

Ia kine ki sem la shna haka jinglut kaba T.5,20,000 ia kaba T.4,50,000/- la bei pisa na ka project MLAMP MBMA bad T.70,000 la synniang da ka Jalyiah IVCS.

U Deputy Commissioner ha ka jingkren jong u kum u kongsan ha ka jingialang plie u la ai mynsiem ia ki dkhot jong ka Jalyiah IVCS ba kin iaid shakhmat ia kane ka kam kaban ai jingmyntoi bad jingiohnong ia ki. U la ong shuh shuh ba kane ka long tang ka jingsdang bad kyrmen skhem ba lyngba kane ka unit kaba rit kan dang lah shuh shuh ban pynkiew ia ka kam ri jingri bad kaban lah ban pyndap ia ka jingdonkam ia ka doh sniang doh syiar ha la ka shnong lajong kymjuh ruh ban lah ban die sha kiwei pat ki shnong bad ki iew hapoh ka district.

U la bynrap shuh shuh ban shim kabu ia ki lad jingiarap ba ioh na ki tnad sorkar bapher bapher bad ban long kiba iatreilang khnang ba yn nang lah shuh shuh ban kyntiew ia ka ioh ka kot jong ka shnong ha baroh ki liang.