Ioh ka Jowai iaka sport climbing wall kaba nyngkong eh ha Jylla

Syllad | The Rising MeghalayaJanuary 21, 2025

Kan long ka jingsarong iaka Jowai ba kan ioh iaka sport climbing wall ne biar ban kiew kaba nyngkong eh ha Jowai, kaba long u mawjam ba thymmai ha ka kam ialehkai sports ka Jylla.

Kane ka sport climbing ka dei ruh shimbynta ka jingialehkai jong ka lympung 6th Meghalaya Games la plie paidbah ha ka 20 tarik Kyllalyngkot ha Kiang Nangbah Indoor Hall da u MLA ka thain u Bah Wailadmiki Shylla ha ka jingiadon lang u working president ka MSOA u Bah John F Kharshiing bad u Director of Sports & Youth Affairs, u DD Shira bad kiwei kiwei.

“Kane kan dei ka sngi ka jingkmen ka ban sah jingmynmaw ha ki snem ki ban dang wan,” ong u Bah Wailadmiki uba la kdew ruh ia ka jinglong kyrpang ki jaka hapoh Meghalaya kaba pynlong ka jaka kaba biang bha na ka bynta ki kam kiew lum bad pynpaw ruh ka jingsngewnguh ia ka Sorkar Jylla halor ka jingkyrshan kaba pura.

Na ka liang u Head Coach u Bah Wallambok Langdoh u la ban jur ia ka jingiaid lynti bad ka jingaiti lut jong ki nongkiew lum na la ka jong ka jylla da kaba ong, ” Wat hapdeng ki jingduna ia ki jingdonkam kiba kongsan, hynrei ki nongkiew lum ki jong ngi ki la ioh ia ka jingpyntbit abd ki shipai Indian Army ha Shillong, Assam bad hapoh Gorkha training centre. Ka jingaiti lut ka jong ki ka la wanrah ia ka jingioh khur takma ha ki kyrdan jong ki jingiakop zonal bad national.”

U la ong ruh ba ka jingpynrung ia kane ka Climbing Wall ka long ka sienjam kaba kongsan nangne shakhmat bad ka ban nanglah ban sei ia ki sap ki phong kiba thymmai bad wanrah ka jingithuh kaba kham kongsan ia kane ka thain ka jong ngi.