Ioh ka MCH Hospital Jowai iaka jaka test jingpang HIV

Syllad | The Rising MeghalayaJune 12, 2024

Khnang ban lap ia ka jingdon jong u khniang jingpang HIV ha ki longkmie kiba ar met, ka Maternal and Child Health Hospital (MCH), Jowai bad ka Meghalaya Aids Control Society Shillong ki la plie paidbah iaka Integrated Counselling Testing Centre (ICTC) ha MCH Hospital kaba don ha Panaliar ha ka 11 tarik Jylliew.

Hashwa ban plie paidbah ia kane ka Centre, la don ka jingialang ba la pyniaid da u Dr. E War Superintendent MCH Jowai haka jingdonlang ka Project Director jong ka MACS ka Dr. B. Decruse, u Incharge DM&HO West Jaintia Hills District Dr. K Dhar nalor kiwei kiwei.

Ka Project Director jong ka MACS ka Dr. B. Decruse haka jingkren lamkhmat, kala iathuh ba ka Integrated Counselling Testing Centre (ICTC) kadei ka jaka ban pynlong ia ka jingiasyllok bad ki briew ban batai halor u khniang jingpang HIV bad ia ka jingdonkam ban test ia ka snam khnang ban tip ba ki don ne kim don ia u khniang jingpang HIV da ka mon sngewbha ka jong ki bad ka pynthikna ba ia ka report jong ka jingtest snam yn tip tang u nongpang bad u doktor uba u sumar sukher iaki.

Ka jingplie iaka ICTC ha MCH Hospital, Jowai ka long kaba donkam namar kane ka hospital ka ai jingsumar iaki longkmie armet bad kiba kha khun bad bynrap ba ka jingtest kan sdang naduh ka jingwan checkup haduh da la dep kha khyllung bad lada lap ba don u khniang jingpang yn sdang noh mardor ia ka jingsumar khnang ba u khniang un nym hiar sha ki khyllung hapoh kpoh.

Ha kaba iadei bad ka jingpang HIV, kala ong ba kadei ka jait jingpang kaba haduh mynta mynne kam pat don satia kino kino ki dawai ki dashin kiba lah ban pynkoit pura iaka, hynrei ki don pat ki jait dawai kiba lah ban ai jingiarap iaki nongpang bad pynjlan ia ka jingim.

Kala iathuh ba haka jylla Meghalaya lada khein hapoh ka ri India ka poi haka kyrdan kaba 7 haka jingkynrei jong kane ka jingpang HIV bad na ki District ka Jaintia Hills kadei kaba bun eh ka jingpang HIV.

Ha kaba iadei bad ka jingkharoi jong une u khniang, kala ong kiba bun ki briew ki pyrkhat ba ka jingpang ka wan hapdeng ki briew kiba iaid awria, kiba injek drok hynrei haka jingwad bniah, la lap ba kamdei kumta, hynrei kadei hapdeng jong ki riew paidbah kiba khlem leh ia kita ki kam hynrei ki shu ngat la ka ngat ha kane ka jingpang.

Kala ong kumba long mynta 79% na ka 100 percent kiba ioh ia une u khniang dei hapdeng ki riew paidbah, tang 4% dei hapdeng jong ki kynthei kiba iaid awria katba 8.1 percent dei hapdeng kiba injek drok, bad bynrap ba dei na kata ka daw donkam bha ban leh iaka test khnang ban lait saphriang une u khniang jingpang.

Kiwei de kiba la aijingkren ki long u Dr. S. Sumer O&G Specialist MCH Jowai, ka Dr. Helen Uriah, District MCH Officer, West Jaintia Hills District, ka Kong Manribha Laloo MCH ICTC Counselor katba haba kut ka jingialang ka Kong Mamata RC. Rymmai Deputy Director ICTC MACS kala ai ki kyntien khublei.