Ioh ka Meghalaya ia ka jaka pynmih sboh rep kaba nyngkong ha Mawphlang

Syllad | The Rising MeghalayaAugust 16, 2023

Ka jylla Meghalaya ka la ioh pdiang ia ka jaka pynmih sboh rep (bio fertilizer) kaba nyngkong eh ha ka jylla na ka bynta ban kyntiew ia ka rep ka riang hapoh a shnong Kyiem ha Mawphlang East Khasi Hills District.

Ia kane ka jaka pynmih sboh la plie da u Myntri Rangbah ka jylla u Conrad K Sangma mynta ka sngi Balang, bad ka jingthmu jong kane ka long ban kyntiew ha kaba iadei bad ka jingpynmih ia ki mar rep ki bym ai dawai bad ka jinglah ban shalan ia kine ki jait mar rep ba khlem ai dawai.

Ha ka jingkren u CM u la ong ba ka jingplie ia kane ka jaka pynmih sboh rep kan kyrshan jur ia ki sienjam ba la shim da ka sorkar jylla ban kyntiew ia ka rep ka riang ka ban lait na ka jingpyndonkam dawai.

U CM u la ong; “Ka thong jong ngi ka long ban pynshlur ia ka rep khlem kino kino ki dawai ha baroh kawei ka Jylla bad kane ka jinglah ban wanrah ia kane ka jingpynmih sboh rep ka dei kawei na ki kam ba kongsan.”

 “Ka jingpynmih ia ki mar rep kiba khlem ai dawai ka shong eh ha ka jingpynmih ia ka sboh, bad kumta lada ngim lah ban pynthikna halor ka jinglah ban pynmih katkum ka jingdonkam bad ha ka dor kaba biang kumjuh ka por kaba dei, baroh kine ki jingpyrshang kin long lehnoei,” ong shuh shuh u CM ka jylla.

Nalor kata u la ogn ruh ka jingdonkam jong ka Jylla ia ka sboh khlem dawai ka kot haduh 25,000 metric ton, bad namar ka  jingrep khlem dawai kala nang kiew bad nang pur sha kiwei kiwei ki bynta jong ka Jylla, kumta ruh la khmih lynti ba ka jingdonkam ia kane ka sboh kan nang kiew shuh shuh.

Kumta ruh na ka liang u CM ka jylla u pynpaw ka jingkyrmen kaba skhem ba kane ka jaska pynmih sboh kan shim ia ka bynta ba kongsan bha ha kaban pyndap pynbiang ia ka jingdonkam  jong ka thain bad ka Jylla.