Ioh ka shnong Kongthong ia ka nam “Best Tourism Village” ha ka National Tourism Award 2023

Syllad | The Rising MeghalayaSeptember 27, 2023

Ka shnong Kongthong kaba don hapoh East Khasi Hills district kaba dei ka shnong kaba pawnam bha namar ka jingpyndonkam ia ka jingkynud sur bad ka siaw ka rwai haba pyrta ne khot briew khamtam haba don sha khlaw sha btap ka la ioh pdiang ia ka khusnam “Best Tourism Village” (Bronze) ha ka National Tourism Awards 2023 ba la pynlong man ka snem da ka Ministry of Tourism ka Sorkar India.

Ia kane ka khusnam la ai sha ka shnong Kongthong ha ka jingialang kaba la long haka sngi Balang hapoh Bharat Mandapam, Pragati Maidan, New Delhi lyngba u V. Vidyavathi, IAS, uba dei u Secretary ka Ministry of Tourism ka sorkar India, kata kum ka dak ka jingithuh halor ki sienjam ba la shim ban kyntiew ia ki kam jngohkai pyrthei bad ban pynneh pynsah ia ki riti dustur kiba hiar pateng.

Ka shnong Kongthong kaba don hapoh Khat-ar shnong ka dei kaba la tip bha ruh kum ka ‘Whistling Village of India,’ namar katei ka rukom pyndonkam ia ki sur kynud bad siaw haba ki ia khot ia pyrta para ma ki khamtam shalum sha wah.

Ha ka juk ha kaba ki briew kila pyndonkam da ki mobile phone, video chats bad text message ban iakren ia khana, hynrei ki nongshong shnong jong ka shnong Kongthong kila iakren para ma ki tang lyngba ki sur kynud bad ka siaw ka rwai lyngba ki rukom sur bapher bapher hab ia khot ia pyrta para ma ki.

Kane ka jingpyndonkam ia kine ki sur kynud, siaw bad rwai ka dei ka rukom ba kila ju pyndonkam ki por jong uba rim bajah kaba la pynkylla long ia kane ka shnong ba kan kylla long kaba pawnam ym tang hapoh ka ri India hynrei ha ka pyrthei hi baroh kawei.