Ioh ka West Jaintia Hills 4 ngut ki coach football AFC ‘C’ license, 2 ngut ki coach iaka skul North Liberty

Syllad | The Rising MeghalayaApril 18, 2025

Ha ka jingjop kaba khraw na ka bynta ki nongshong shnong kiba ieit ia ka jingialehkai football ha West Jaintia Hills, sawngut ki coach na kane ka thain ki la pass bad iohpdiang iaka AFC C Diploma Coaching License kaba pyni ia ka sienjam kaba khraw ban lah ban kyntiew ia ka kam ialehkai football hapoh ka thain.

Ia kane ka Certification Course la pyniaid da ka All India Football Federation (AIFF) bad la pynlong ha Shillong naduh ka 12 haduh ka 23 tarik u Lber 2025. Katba ka jingpynbna ia ka result ka la long ha ka 16 tarik Iaiong.

Kine ki coach kiba dang shu ioh ia ka jingpynskhem ki kynthup ia u  Damehi Kyndiah, Joshwa Pohdweng, Timmy Ryngkhlem, bad u Aibormiki Suchiang—baroh saw ngut kiba dei napoh West Jaintia Hills.

Kane ka jingjop ka jong ki ym tang ba ka pynpaw tang ia ka jingaiti lut ka jong ki shimet, hynrei ka ai ruh ka jingkyrmen ia ka lawei ha ki kam aijinghikai ha ka liang ka football bad ka jingpynroi ia ki sap ki phong hapoh ka district.

Lai ngut napdeng kine ki coach, kata u Damehi, u Joshwa bad u Timmy ki dei kiba la jied da ka West Jaintia District Sports Association (WJDSA). Ka bynta ba kongsan jong ka Association ha kaba aijingkyrshan ia ki sap ki phong na ka bynta ki coach kiba dang mih ka la lam sha kane ka jingjop.

Lah ban kdew ba u Damehi bad u Joshwa mynta ki dei Coach hapoh ka skul North Liberty Higher Secondary School, Jowai kaba dei ka jaka pule ba pawkhmat ia kaba la tip bha halor ka jingshimkhia ban kyntiew ia ki khynnah don sap ha ki kam ialehkai sports bad khamtam ruh ban kyntiew ia ka jingialehkai football ha ka kyrdan jong ki skul.

U Aibormiki Suchiang uba la iakhun na lade shimet na bynta ban ioh ia katei ka jingjop, u la wanrah ka jingsngew sarong ia ka district da kaba ioh ia ka diploma halor ka jinglah ka jong u na lade hi shimet, kaba pynpaw ia ka jingkhlain ha ka jingkut jingmut bad ka jingshitom shitom.

Lyngba u kyrwoh kine ki sawngut ryngkat lang ki la pynpaw da kaba ong; “Ngi sngewnguh shibun ia ka West Jaintia District Sports Association halor ka jingtbin lynti bad ka jingkyrshan ka jong ka ha baroh kane ka jingiaid lynti. Kane ka sienjam ka la pynthymmai ia ka jingioh mynsiem ban noh synniang ban kyntiew ia ka jingialehkai football hapoh West Jaintia Hills bad shawei kumjuh.”