Ioh ka West Jaintia Hills iaka jaka shna kali ba nyngkong jong ka Ashok Leyland

Syllad | The Rising MeghalayaAugust 23, 2024

Ha ka sienjam kaba kongsan na ka bynta ka West Jaiñtia Hills, kane ka District ha ka sien kaba nyngkong ka la pdiang sngewbha ia ka jaka ai jingshakri jong ka company shna kali ba paw ka Ri, ka Ashok Leyland Authorized Service Centre, kaba la ai kyrteng “Turoi Motors Ashok Leyland Authorized Service Centre”. Kane ka long ruh tang hadien lai snem ba la plie ia ka Tata Motors Authorized Service Station, kata ha u snem 2021 ha kane ka thain.

Ka ka jaka shna kali-Turoi Motors Ashok Leyland Authorised Service Centre ka don ha Phramer harud ka surok bah National Highway 6 bad la plie paidbah iaka haka 23 tarik Nailar da u Additional SP ka West Jaintia Hills District Bah VDS Rymbai kum u kongsan.

Kane ka jaka shna kali la dei trai da u Bah Pynskhemwanmi Kyndait u khun jong ka Kong Turoi Kyndait, kaba dei ka trai jong ka Tata Motors Authorized Service Station.

Shwa ka jingplie paidbah la don ka jingduwai kyrpang na u Bah Elder. M. Nongtdu haka jingdonlang ki ba haiing hasem, ki kha ki man, ki paralok parajor kumjuh ki trai kali bad kiwei kiwei kiba shah khot sngewbha.

U Bah VDS Rymbai kum u kongsan haka jingkren ula iaroh ia u trai ka karkhana uba la shim ia kane ka sienjam ban thaw iaki lad ki lynti ki ban ai jingmyntoi iaki paidbah jong ka thain bad ka district hi baroh kawei.

“Kane ka jaka kamdei tang na ka bynta ban kamai kajih hynrei ha kajuh ka por ka wanrah iaka jingshakri kaba kham jan sha ki paidbah”, la ong u Bah Rymbai bad bynrap ba ka jingdon jong kane ka karkhana kan long ka jingmyntoi kaba khraw ia baroh ki paidbah kiba don iaki kali Ashok Leyland bad ka long ruh ka jingmyntoi ia baroh ki trai kali kiba ym donkam shuh ban leit shabar jong ka jylla na bynta ki jingdonkam jong ki.

Nalorkata ula ong ruh, kane ka karkhana ymtang ba ka ai jingmyntoi iaki trai kali hynrei ka pynioh kam iohjam ruh iaki samla kiba donsap ban trei ha kum kine ki karkhana.

U SH Ghosh (RSM) haka jingkren ula ong kane kadei karkhana kaba bha tam kaba don iaki jingdonkam baroh bad ka don haka surok bah NH-6 kaba bun tam ki kali kiba wan na Guwahati sha Silchar kiba iaid lyngba kane ka surok bah.

Ula ai khublei ruh ia u Pynskhemwanmi Kyndait uba la iatreilang bad ki bad u kyrmen ba kane ka jaka kan iarap shisha iaka District bad ki jaka ba marjan ban ioh ia ka jingkyrshan bad jingshakri kaba bha tam.

Shwa kane la ioh jingkren pdiang burom na u Bah L. Suiam, Wahid Khan (ASM), Rajesh Dora (AM), Nabarun Bhatacharya (ASM), E. Iakai Service Center.

La pynphuh pynphieng iaka jingplie paidbah da ki jingrwai bad jingshad.

Kino kino kiba donkam iaka jingshakri shabar ka karkhana ki lah ban phone une u number Customer Care 9366216359.