Ïoh kali Ambulance ka Nongtalang CHC

Syllad | The Rising MeghalayaMay 28, 2021

Hadien ka jingdawa kaba la neh la khamslem bha ban pynioh Ambulance iaka Nongtalang CHC, kaba la dawa daki sengbhalang bad ki nongialam shnong ka War Jaintia, ka Nongtalang CHC kala ioh iaka kali kit nongpang mynta ka sngi.

Da ka jingioh ia kane ka Ambulance ka Synjuk Ki Waheh Shnong Amlarem War Jaintia lyngba u Ma Daniel Khongsit ula pynpaw ka jingsngewnguh ïa u MLA ka thaiñ uba long ruh u Myntri Sorkar u ma Lahkmen Rymbui bad ka bor District kynthup naduh u Deputy Commissioner u Bah Garod LSN. Dykes, u District Medical & Health Officer (DM&HO) u Dr KC Ajar, u Sub Divisional Officer (SDO) u Abhilash Baranwal IAS kiba la shimkhia ban pynioh ia kane ka Ambulance.

Ka Synjuk kala dawa ban pynïoh Ambulance haki lai tylli ki jaka sumar kiba don haka thaiñ War Jaintia kynthup ka Nongtalang CHC, ka Jaraiñ PHC bad Padu Dispensary.

“Ka jingioh ka Nongtalang CHC ia kane ka Ambulance kadei ka jingkyrkhu ïa ki namar baroh shi katta ki shem jingeh haba don ba shitom ba pang bad ha ki kam sngewsih,” la ong u Daniel bad kyntu ia u MLA bad ka bor district ban pynïoh Ambulance sa ïaka Jarain PHC bad ïaka Padu Dispensary khnang ba ki paidbah ka thaiñ kin ïoh pyndonkam khamtam ha kine ki por ka khlam COVID 19.