Ïoh kem 5 ngut ki nong Nigeria na Rilum Jaiñtia

Syllad | The Rising MeghalayaOctober 10, 2019

JOWAI: Ki Pulit jong ka East bad West Jaiñtia Hills kila ïoh kem 5 ngut ki nong Nigeria kiba ryngkang pud tuh sha u pud u sam jong ka Ri India. Lai ngut ki nong Nigeria ki pulit kila ïoh kem na Pdengshakap, West Jaiñtia Hill bad arngut pat la kem na Ratacherra Infiltration Check Point, East Jaiñtia Hills District.

U Superintendent of Police West Jaiñtia Hills District, Bah Lakordor Syiem hadien ba kila ïoh jingtip ba ki don ki bar ri kiba wan rung tuh sha u pud u sam ka Ri lyngba ka ri Bangladesh sha West Jaiñtia Hills ula phah ïa u Donkupar Moksha MPS,  Dy. Superintendent of Police (traffic) ban hiar khynra sha Amlarem bad hynne ka step haka por 1 AM kila ïoh bat ïaki nong Nigeria ba kyrteng u Chukwuma Celestine Okwuwa (34) Lucky Osas Enebi (36) and Ndubuisi Mases Chime (28) ba Pdengshakap kaba jngai kumba 10 Kms na Amlarem.

Katba na East Jaiñtia Hills pat la ïoh kem ïa kine ki ar ngut ki nong Nigeria na ka bos Night Super kaba wan na Agartala hynnin ka miet ha Ratacherra Infiltration Check Point. Da ka jingïohkem ïa kine ki ar ngut ki Pulit ka East Jaiñtia Hills kila kem haduh 19 ngut ki nong Nigeria.

Ïa kine ki ar ngut kiba la kem da East Jaiñtia Hills la ithuh kum u Victor Ojichukwu Ugo Okeke (30) bad Ifechukwu Emmanuel Obi (34).

Ha West Jaiñtia Hills la kem ruh ïaki saw ngut trai shnong kiba dei ki nongshong ka Syndai kiba ïarap ïa kine ki nong Nigeria ban ryngkang tuh sha u pud u sam ka ri.

Kine ki trai shnong ki don saw ngut kiba la tip kum Ronaldo Syndai (21) na Syndai Kmaishnong, Ni Pohleng (20) na Syndai Lyngkot, Kliar Mon Pohthmi (18) na Syndai Kmaishnong bad  Rihok Chyrmang (28) na Syndai Kmaishnong.

U SP Bah Lakador Syiem ula ïathuh ba kine ki briew kila mih na Nigeria haka 6 tarik une u bnai ba poi ha Istanbul, Turkey haka sngi kaba bud bad haka step 8 tarik haka 8 baje mynstep kila poi ha Dhaka. Na Dhaka la ïalam iaki da u nong Bangladesh sha khappud ka ri bad haba la poi shapoh u pud u sam ka ri la iarap ïaki da kitei ki saw ngut kiba na Syndai.Kine ki nong Nigeria ki don tang ka passport bad ka visa Bangladesh. Halor kane ka jingïohkem ïa kine ki nong Nigeria ka jingtohkit ki Pulit na ki ar district kala ïaid shakhmat bad ka la pyngngat ïaki hapoh ka kyndon aiñ Foreigners Act.