Ioh kem ka ANTF ia 3 ngut ki nong Mizoram ba donkti khaii kynja bad kyiad

Syllad | The Rising MeghalayaFebruary 3, 2025

Ka Tnad Anti-Narcotic Task Force (ANTF) ka East Khasi Hills ha ryngkat ka jingiatreilang bad ki bor pulit ka Mawryngkneng PS ha ka 2 tarik Rymphang ki la ioh ban kem noh ia laingut ki briew kiba dei napoh Mizoram bad kurup noh ia shibun bah u kynja bad ka kyiad na ka thain Mawryngkneng.

U Superintendent of Police, ka East Khasi Hills, u Bah Vivek Syiem lyngba u kyrwoh haka 3 tarik Rymphang u la pyntip ba kane ka jingioh kurup ka la wan long hadien ba ka Tnad ANTF ka la ioh ban bat noh ia kawei ka kali Tata Yodha kaba don ia u Registration No.  MZ01 Z 3654 kaba mih na Shillong ban leit sha Mizoram.

Haba pynlong ia ka jingkhynra ki dkhot ka Tnad ki la ioh ban kurup noh ia u kynja uba khia haduh 10.455 kilo kynthup ia 235 bilor ka kyiad (750 ml), ki sofa set ba la buhrieh ia kine ki tiar bad artylli ki mobile phone.

Hadien kane la kem noh ia ki laingut ki briew kiba donkti ia kiba la tip kyrteng kum u Sabina Lalnunmawiii (23), Lalrinmawia Chenkua (19) bad u Lalrosanga (28 snem rta).

Na ka liang ki pulit ki register case pyrshah ia kine ki briew hapoh Mawryngkneng police station ha ki lyndon ka NDPS Act.