Ioh kem ki BSF ia san ngut ki suba nong Bangladesh kiba wan bylla na Chennai

Syllad | The Rising MeghalayaOctober 4, 2024

Ki shipai Border Security Force (BSF) kiba iai bteng ban peitngor ia ka jinglong jingman ha ki thain khappud jong ka Ri ki la ioh ban kem noh ia san ngut ki suba nong Bangladesh kiba shong da ka auto rickshaw na ka liang ka Dalu ban leit sha Purakhasia, hajan ki bynta khappud ka West Garo Hills.

Kane ka la wan long hadien ba ki BSF kiba iaid pahara ha ka 2 tarik Risaw ki la iohi ia kawei ka kali auto rickshaw bad phah pynieng noh kham najngai na ka jaka kaba ki ap pahara.

Hynrei, ki san ngut ki briew ki la mih noh na kan ka kali da ka jingpyrshang ban phet krad. Hynrei ki shipai ki la behthong ia ki bad ioh ban kem noh ia baroh.

Hadien ka jingtohkit la shem ba kine ki san ngut ki la wan napoh Chennai, Tamil Nadu, ha kaba ki la trei hapoh kawei ka karkhana jain ha Chennai bad ki don ia ka jingthmu ban leit rung beain shapoh Bangladesh.

Hadien ia kine ki briew la aiti noh sha ki bor pulit ha Dalu PS, ban leh ia kaba donkam.