Ioh kem ki pulit ia ki 3 ngut ki runar na Assam ba donkti ha ki kam lute ha NGH

Syllad | The Rising MeghalayaJuly 3, 2024

Ki bor pulit ha ka 1 tarik mynta u bnai ki la ioh ban kem noh ia ki laingut ki runar kiba dei na Assam kiba donkti ha kiba buntylli ki kam lute naphang na ki nongshong shnong ha ka thain Mendipathar, North Garo Hills District.

Na ka liang u Superintendent of Police u Pawar Swapnil Vasantrao ha ka 2 tarik Naitung, u la pyntip ba ha ka 18 tarik u bnai ba la dep ka la don ka jingjia shah lute ha ki sawngut ki runar kieng atiar bym lah ban ithuh kiba la wan da kawei ka  Scooty Aprill No AS18J-0181 bad ka Bajaj Pulsar 220 (black) AS18 E-7925 kiba la lute naphang na ki nongleit nongwan da kaba pynap da ki pistol. Kine ki runar la ong ba ki la ioh ban rongtuh haduh T.80,000 ka pisa kynthup ia ki kot ki sla jong ki riew shimet nalor artylli ki mobile phone.

Ha kane ka juh ka sngi ha ka por janmiet une u heh pulit u la ong ba ki nongshong shnong ka Beldongpara, Assam ki la ioh bat ia kane ka Pulsar hynrei nongniah bad uba iadon lang ki la ioh ban phetkrad na kane ka jaka, bad hadien la aiti noh ia kane ka thuk thuk sha ki bor pulit ha Mendipathar Police Station.

Na ka liang u SP ka NGH u la ong ba ha ka 19 tarik u Jylliew ba la dep ki lanot kiba la ngat ha katei ka jingjia shah lute ki la ujor da ka ejahar ha Medipathar PS ha kaba la register case pyrshah ia kitei ki nonglute.

Hadien ki pulit hapoh ka jingialam u Dy.SP, Special Ops bad ka Kynhun ki Pulit ka District, kila pynlong ka jingkhynra ha ki thain Assam bad ha ka 24 tarik Jylliew, kila ioh ban kem noh ia u Nongniah ka scooty uba kyrteng u Sunil Boro uba dei na Goalpara, Assam bad ioh kurup ruh ia ka scooty. Une u la phla ia ka jingdonkti jong ki laingut kiwei pat ia kiba la tip kyrteng kum u Kaltu Rabha, Turti Basumatary bad u Sahadev Basumatary, kiba dei na ka thain Dudhnoi, Assam.

Haba bteng ia ka jingthwet ia kine ki runar, ki pulit ha ka 1 tarik Naitung, ki la ioh ban kem noh sa ia u  Turti Basumatary hadien ba ula wan ban pyndem hi dalade hakhmat ki Pulit ka NGH lem bad kawei ka pistol kaba don artylli ki kuli. Da ka jingialam lynti une u runar, ki Pulit kila ioh kem sa ia u Sahadev Basumatary na Tikrikilla, West Garo Hills. Mynta ka jingkhynra ka dang iai bteng ban iohkem sa ia u Kaltu Rabha uba donkti ha kane ka kam pyntriem.