Ioh kem ki pulit ia ki suba donkti pyniap ia u khynnah 10 snem ha Umtangar, Ri Bhoi

Syllad | The Rising MeghalayaFebruary 22, 2024

Ki bor pulit ka Ri Bhoi District ki la ioh ban kem noh ia arngut ki briew kiba la shah suba donkti halor ka jingjia shah pyniap dusmon jong uwei u khynnah uba dang 10 snem rta hapoh ka shnong Umtangar, Ri Bhoi District.

Na ka liang u Superintendent of Police ka Ri-Bhoi u la ong ba kine ki arngut ki suba donkti ha kane ka kam pyntriem ki dei kiba la tip kyrteng kum u Pynshailang Warjri 32 snem rta uba dei na ka shnong Umtangar bad u Banshngain Tynsong 28 snem rta uba dei na Nongthymmai Lapalang, PS Pynursla bad uba shong ba sah mynta ha Umtangar, Ri Bhoi District.

Kane ka jingjia ba sngew myllung bad pynher syrngiew ia kiba bun balang ka la paw pyrthei hadien ka jingujor ejahar da kiba haiing hasem jong une u khynnah ba la khlad noh ia uba la tip kyrteng kum u Kitdorlang Marbaniang 10 snem rta uba dei na ka shnong Umtangar ha ka 19.02.2024, kata hadien ba la lap ia ka metiap jong u ha ka 18.02.2024 ha ka por kumba 7 baje janmiet na ka kper jong u Bah Comand Nongrang ha Umtangar hadien ba u la jah rngai naduh ka 17.02.2024.

Na ka liang ki pulit kila rejistar case ia ka ejahar bala mudui da ki bahaiing hasem une u khynnah ha ka 19 tarik mynta u bnai hapoh ki kyndon 302 IPC. Ki pulit ki la sdang ruh ban pynlong ia ka jingtohkit pyrshah ia kine ki arngut ki suba khnang ban lap ia ka daw tynrai kaba lam sha kane ka jingjia shah pyniap jong une u khynnah.