Ioh kem ki Pulit Ri Bhoi ia 12 ngut ki nong Bangladesh kynthup u nongialam ka kynhun khaii briew

Syllad | The Rising MeghalayaMarch 27, 2025

Haduh khatar ngut ki nong Bangladesh kiba wan rungtuh ki la shah kem noh haka 26 tarik Lber na ka thain Byrnihat, Ri Bhoi District.

Kane kala wan hadien ba ki pulit kila pynshong nongrim iaka jingtip kaba kila ioh ba u nongialam jong ka kynhun runar kaba donkti ha ki kam khaii briew sha shiliang u pud ka India-Bangladesh uba kyrteng u Sukur Janab Shaikh uba la wan na Mumbai sha Guwahati ha ryngkat ka kynhun ki nong Bangladesh kiba wan beain, ka kynhun ki pulit Ri Bhoi ki la pynlong ka jingkhynra ha ka rel No. 15945 (LTT-Dibrugarh Station) ha Kamakhya Junction bad Guwahati Junction.

Watla ym shym la lapdien ia u Sukur hynrei la lapdien ia ki dak ki shin ha kane ka jingkhynra ha kaba la ioh ban kem noh ia ki 11 ngut ki nong Bangladesh kaba kynthup ia arngut ki khynnah na ka jingtalasi ha Byrnihat. Kine ki briew ki la wan da kawei ka kali Tata Sumo kaba don ia u Registration No. AS-01-EC-3528, ong ki pulit.

Kine ki briew kiba la shah kem noh ki dei kiba la tip kyrteng kum u Kakali Sardar (36), Hirina Dili Mulla (30), Unjilla Sadar (32), Rabia Begum (37), Panna Kamal Hussain (42), Poppy Hasu Mollah (26), Sonia Shaikh (24), Sobha Islam (28) bad Saja Uddin Sk (26 snem rta), ong ki pulit.

U Superintendent of Police ka District u Vivekananda Rathore u pyntip ba ha ka jingpynlong shuh shuh ia ka jingtohkit da ka jingiarap ki pulit ka Assam, utei u nongsylla u Suku Janab ba khot sin Sukur uba dei na Narail District ka Bangladesh u la shah kem noh na Nalbari District ha kane ka juh ka sngi.

“Kine ki briew ki la shong la sah beain ha India ha kaba la ioh kurup ruh na ki ia ki kot ki sla kiba shu shna thok kum ki Aadhaar Card, PAN Card bad kiwei kiwei. Kine ki don ia ka jingthmu ban leit sha ki thain Dawki da ka jingthmu ban jam sha shiliang khappud ha ka por mynmiet lane ha ka step kaba bud,” u la ong.

Halor kane la register case pyrshah ia kine ki briew ha Nongpoh Police Station bad ka jingtohkit ka jingiaid shakhmat, bynrap u SP.