Ioh kem ki pulit Ri Bhoi ia hynniew ngut ki nonglute, ioh kurup tiar siat

Syllad | The Rising MeghalayaAugust 5, 2023

Ki pulit ka Ri Bhoi district ki la ioh ban kem noh ia hynniew ngut ki snar nonglute kiba donkti ha ka jingshah lute ba dang shen kaba la jia ha ka shnong Umduba bad na Umnowe Killing kiba hap hapoh Khanapara Police Station, Ri Bhoi District.

Na ka liang u Superintendent of Police, Ri Bhoi District u Giri Prasad ula ong ba kitei ki jingjia shah lute ki dei kiba la jia ha ka jaka tylliat maw ha ka  22.05.2023 bad ha ka 11.07.2023 hapoh ka shnong Umduba bad ha Umnowe Killing.Kine ki jingjia ki la wan jia  hadien ba ki runar kiba la kieng atiar bha bad kiba kah durkhmat ki la rung jubor ha kitei ka jaka tih maw bad ioh rong T. 85,400 hajar  na Umduba bad T. 1,90,000 na Umnowe Killing plant. Halor kane ki pulit ki la register case ha ki kyndon bapher bapher jong ka IPC ha Khanapara Police Station.

Utei u heh pulit u la ong ba hadien jong katei ka jingshah lute ka tnat pule ka la thaw ia ka kynhun tohkit ba kyrpang ne ka  Special Investigation Team (SIT), bad hadien ka jingtohkit bniah bad lapksai la pynlong ia ka jingkhynra tad haduh ban da ioh kem ia kitei ki hynniew ngut ki runar kiba donkti.

Kine ki hynniew ngut ki briew kiba shong ba sah ha ka shnong Umduba ki dei kiba la tip  kyrteng kum u Kandil Marak, u Rechi Momin, u Wilsh Marak, u Robert Momin, u Marus Marak, u Bimod Marak bad u Collin Marak.

Shuh shuh hadien ka jingtohkit kaba bniah na ka liang ki bor pulit ki la ioh ruh ban kurup noh ia ki tiar siat bad kiwei pat ki jait tiar ba la pyndonkam da kane ka kynhun runar, kata kaba kynthup ia kawei ka suloi bad artylli ki pistol shna hi, ki riam shipai, saw song u bakhor shna kuli, kawei ka suloi airgun bad kiwei kiwei.