Ioh kem nong Bangladesh ka VDP Sonapyrdi, thmu ban leit rieh sha Ladrymbai

Syllad | The Rising MeghalayaAugust 9, 2024

Ki shipai iada shnong – Village Defence Party (VDP) jong ka shnong Sonapyrdi, East Jaintia Hills District ka la iohkem ia uwei u nong Bangladesh uba la phrung tuh sha ri India lyngba ki Shnong khappud Indo-Bangladesh haka 9 tarik Nailar.

Ia une u nong Bangladesh ki shipai iada shnong kila ioh ban bat haka por kumba 5 PM.

Ki VDP shnong Sonapyrdi kila ioh bat ia une u nong bangla ha ka por ba ki pynlong iaka jingiaid patrolling hapoh ki u pud u sam ka shnong hapoh ka jingialam u president VDP u bah Boikmen Mynthoi bad assistant secretary VDP u bah Stephan Lamare, ryngkat u Naik bad ki volunteers VDP.

Haba ki VDP shnong kila tohkit ia une u nong Bangladesh u la iathuh hok ba u wan na Bangladesh bad u mut ban leit rieh sha Ladrymbai. La aiti ia une u nong Bangladesh sha Lumshnong Police Station ban leh ia kaba donkam.

Ka VDP Sonapyrdi ka la sngew lyngngoh ba kumno une u nong Bangladesh u la ioh ban rung beain sha India ha kum kane ka por ba jur ka jingklumar ha Ri Bangladesh. Ka VDP Sonapyrdi ka kyntu ruh ia ka sorkar ban pynkhlain ia ki bor pahara da kaba buh ia ki infiltration check post kiba khlain ha ki thain Sonapyrdi khnang ba nangne shakhmat ki nong Bangladesh kin ym ioh shuh ban rung sha India lyngba ki shnong khappud ba don ha ka thain namar ki BSF kiba don hajan jingkieng Sonapyrdi kim lah ban tehlakam ia ka jingwan rung kyrthep ki Khâr Bangladesh.