Ïoh Khnap Thangbru ka Seiñraij Ummulong

Syllad | The Rising MeghalayaJune 30, 2019

JOWAI: Ka Eco-Friendly Crematorium kadei ka jingtei ba la shem bad pynwandur da u ma Kambel Shullai (Bam kwai ha dwar u Blei) kaba long ka jingtei ba la shna ban kham pynsuk ia ka rukom pyndep niam iap da ki briew ba dang don ha ka jingngeit niam tynrai bad ruh shibynta ka long ka jingtei kaba iarap ban pynneh pynsah ia ka jinglong jyrngam ka mei mariang bad ki sawdong sawkun jongka.

Ka long ka khubor ba sngewtynnad ba ka Seinraij Ummulong da ka jingtrei shitom ki riew rangbah, ki khun ka Seinraij Ummulong bad da ka jingiarap ka Seinraij Jowai bad ki nongmihkhmat ki la ioh ban shna pyndep bad plie paidbah ia ka Eco-Friendly Crematorium.

La plie paidbah ïa kane ka Khnap Thangbru da u Ma Sniawbhalang Dhar, Myntri jong ka tnad Transport bad kiwei, Govt. of Meghalaya kum u kongsan haka 29 tarik une u bnai. La ïadonlang U Ma Thombor Shiwat, CEM-JHADC kum u symbood kongsan, u Wailadmiki Shylla, MLA Jowai, u Doloi Elaka Jowai Puramon Kynjing, President Seinraij Jowai OR Challam, kiba haiing hasem u (L) Kambel Shullai, ki riew rangbah na kiwei ki Seinraij, u Waheh Shnong Ummulong Liyoo Laloo bad kiwei kiwei

Ia ka jingialang ha kane ka sngi la pyniaid da u M Passah, President Seiñraij Ummulong ha kaba laioh ia ka nguhblei demblei na u M Passah bad ki jingkren lyngkot na u General Secretary SRJ Ummulong.

U ma Sniawbhalang Dhar haba ai jingkren um lah khlem da kynmaw ia ki riew rangbah ka Seiñraij Ummulong jong ki por ba laleit kiba la trei shitom ha kaban pynneh pynsah ia ka niam ka rukom bad ruh kyrpang u da iai pyrto ia ka kyrteng u (L) Kambel Shullai ha kaba u la ong ba kane ka jinglah u (L) Kambel Shullai ban pynmih pyrthei ia ka Eco-Friendly Crematorium ka long ka jingsngewsarong ia ka ri bad ka jaitbynriew.

U ma Sniawbhalang ula khot ula wer ia ki khun ka Seinraij Ummulong ba kin long kiba ialeh ban wanrah ka jingkhuid jingsuba ia kane ka Eco-friendly Crematorium bad ruh ha baroh ki sawdongsawkun kane ka jaka.

Ha kane ka sngi ladon ruh ka jingpynkum burom kyrpang ia kiba ha iing ha sem u (L) Kambel Shullai bad ruh la don ka jingpynlait paidbah ia ka Souvenir jong ka Seinraij Ummulong da u symbood kongsan ma Thombor Shiwat, CEM-JHADC.

Written by: Solangki D Laloo | Jowai