Ioh khusnam Padma Shri u Prof David R Syiemlieh ba noh synniang sha ka thoh ka tar

Syllad | The Rising MeghalayaJanuary 26, 2025

U Chairman barim ka Union Public Service Commission (UPSC) u Prof David R Syiemlieh u la ioh pdiang ia ka khusnam Padma Shri 2025 na ka bynta ki jingnoh synniang jong u ha ka thoh ka tar bad ka pule puthi.

Ka khusnam Padma kaba dei kawei na ki khusnam kaba hakhliehduh jong ka ri ba ju ai sha ki riew paidbah la ai ha ki laitylli ki kyrdan, kata ka Padma Vibhushan, Padma Bhushan bad Padma Shri.

Ia ki khusnam la ai ha ki bynta jong ki jait jingtreikam bapher bapher, kata la ka long ha ka liang ka art, ka kam imlang sahlang, ki kam paidbah, science bad engineering, khaii pateng bad ki kam karkhana, ba iadei bad ki dawai dashin, ka thoh ka tar bad ka pule puthi, sports, ki kam shakri sorkar bad kiwei kiwei.

Ia kane ka jingai khusnam la ju pynbna ha ka sngi rakhe ia ka Republic Day man la u snem.

Na ka bynta u snem 2025, ka President ka ri India ka la mynjur ban ai ia ki 139 tylli ki khusnam Padma kynthup. Kane ka thup kyrteng ka kynthup ia 7 tylli ki khusnam Padma Vibhushan, 19 tylli ki Padma Bhushan bad 113 tylli ki khusnam Padma Shri. 23 ngut kiba la ioh khusnam ki dei ki kynthei bad ka thup ka kynthup ruh ia 10 ngut ki briew na ka kyrdan Foreigners/NRI/PIO/OCI bad 13 ngut kiba la ioh khusnam hadien ka jingkhlad noh.