Ioh kor Ultrasound bad Anaesthesia Dr Norman Tunnel Hospital, ka jingkyrkhu iaka district ban iada iaka jingiap ong u DC Garod

Syllad | The Rising MeghalayaNovember 17, 2021

Ka Dr Norman Tunnel Hospital kala ioh iaka kor Ultrasound bad ka Anaesthesia Workstation. Ia ka kor Ultrasound la ai sngewbha da ka karkhana dewbilat, ka Star Cement kaba shongdor T.20 lak bad ka Anaesthesia Workstation T.10 lak lyngba ka Chief Minister Special Development Fund.

Baroh ar tylli kine ki kor la iarap iakren bad pynioh da ki ar ngut ki MP ba kynthup ia u MP Lok Sabha ma Vincent H Pala bad u Dr WR Kharlukhi.

Na kaliang ki ar ngut ki MP ka Jylla haba kren ha kane ka jingialang plie ia kine ki kor haka sngi Balang kila kular ba kin pyrshang katba lah ban iarap ia kane ka hospital kaba rim tam ha Rilum Jaintia. Kila pynpaw ba ki don ka jingiadei kaba jan bad kane ka hospital bad kin pyrshang ban pynioh iaki lad jingiarap ban pynbiang iaki jingdonkam kane ka hospital naduh ka building, ka skul pule nurse bad kiwei kiwei.

U Tejbir Singh, Administrator Star Cement ula iathuh ba ka kharkhana lyngba ka Corporate Social Responsibility (CSR) marsien ai ktien u MP ka Lok Sabha halor ka jingdonkam ka hospital ia kane ka kor, mar mar kila rai ban ai namar ba ka dei ka kor kaba iarap ban pynsted iaka jingai jingsumar bad ban iada iaka jingiap.

U Deputy Commissioner, West Jaintia Hills District Garod LSN Dykes ula ong ba ka jingioh ia kane ka kor Ultrasound kan long ka jingkyrkhu kaba khraw iaka hospital namar ba kan iarap ha kaban lap kloi ia kino kino ki jingpang, khamtam ia jingsumar iaki longkmie kiba armet ban iada iaka jingiap.

“Ka Jylla bad ka district hi ka dang sahdien ha kaba iadei ban iada iaka jingkhlad ki longkmie ba armet. Haka district jong ngi haka taiew kaba la dep ruh dang don ka longkmie ba armet kaba khlad bad lajan man ka taiew ki don ki longkmie kiba khlad haka por ba shah sumar ban kha khun,” la ong ma Garod.

“Kane ka kor kan pynkloi ban lap iaki jingshitom khamtam iaki longkmie ba armet bad ban iada iaka jingiap,” ong u DC Garod bad ai khublei ia kiba don bynta ban pynioh ia kane ka kor.

Iaka jingialang la pyniaid da u Pastor NS Phawa Chairman Managing Committee ha ka jingiadonlang ka Dr D Nongpluh, Medical Superintendent of Dr Norman Tunnel Hospital, ki nongtrei, ki nurse ka hospital nalor kiwei kiwei.